Njihuni me BiblioTech, projekti që shndërron bibliotekat e qytetit në qendra të zhvillimit të teknologjisë dhe inovacionit

Njihuni me BiblioTech, projekti që shndërron bibliotekat e qytetit në qendra të zhvillimit të teknologjisë dhe inovacionit

Bibliotech

Financuar nga UNICEF Albania dhe me mbështetjen e Bashkisë Tiranë, Shoqata Shqiptare për Zhvillim të Qëndrueshëm, është duke implementuar një projekt, që sjell risi në qytetin e Tiranës. Bëhet fjalë për nismën ‘BiblioTech’, e cila do të shndërrojë bibliotekat e lagjeve në inkubatorë të teknologjisë.

Për të mësuar më shumë rreth këtij projekti, risive që sjell dhe mënyrës sesi do të funksionojë, BusinessMag zhvilloi një intervistë me Faola Hodaj, e cila është menaxhere e projektit.

Si lindi ideja e projektit BiblioTech?

Bazuar në gjetje dhe raporte mbi përdorimin e internetit në Shqipëri, rezulton se hendeku i përvetësimit dhe aftësive digjitale mes prindërve dhe fëmijëve është i madh. Sondazhet gjithashtu tregojnë se vështirësitë që hasin prindërit në fushën e teknologjisë i bëjnë më pak të ndërgegjshëm mbi rreziqet që mund të hasin fëmijët gjatë kërkimit në internet. Për më tepër, ekziston një hendek gjinor në fushën digjitale. Meshkujt janë relativisht më të prirur të studiojnë dhe punojnë në fushën e ICT-së, si edhe të jenë ndërtues platformash apo aplikacionesh.

Në këtë kontekst lindi ideja e Bibliotech. Jemi një ekip njerëzish që besojnë se komuniteti ka nevojë për hapësira publike, të cilat ofrojnë infrastrukturë teknologjike. Të rinjtë kanë aftësi të jashtëzakonshme dhe kanë mundësinë të shkollohen dhe të trajnohen në shkolla të mira për t’u bërë sipërmarrësit dhe profesionistët që i duhen vendit.

Tirana ka zhvillim të madh dhe ekosistemi i sipërmarrjes është në rritje. Bibliotekat e qytetit kanë marrë zhvillim infrastrukturor, por do të ishte vlerë e shtuar për to që të kishin edhe një kalendar aktivitetesh në fushën e inovacionit dhe teknologjisë.

Cili do të jetë roli i këtyre bibliotekave?

BiblioTech do të ketë një rol mbështetës për komunitetin. Kjo është një nismë e qëndrueshme, e cila do të mbështesë zhvillimin e ideve dhe projekteve teknologjike. BiblioTech synon të bashkojë të gjithë të apasionuarit e teknologjisë dhe inovacionit në këto ambiente, duke ofruar jo vetëm hapësira pune por edhe trajnime dhe aktivitete informuese.

Në cilat biblioteka do të implementohet projekti?

Projekti do të implementohet në katër biblioteka të qytetit, përkatësisht biblioteka “Musine Kokalari” (njësia 7), “Hamit Beqja” (njësia 8), “Misto Treska” (njësia 10) dhe “Aleksandër Moisiu” (njësia 4).

Kush mund të ketë akses në këto biblioteka?

Do të doja që bibliotekat të ishin një hapësirë ku të gjithë grupmoshat të ndihen të lirshëm dhe më e rëndësishmja të mësojnë gjëra të reja. Të rinjtë, studentët, profesionistët e fushës dhe çdo i apasionuar në fushën e teknologjisë do të ketë mundësinë të ndjekë sesionet e trajnimit që do të ketë kalendari i bibliotekave. Po gjithashtu mirëpresim ide për aktivitete të reja. Bibliotekat nuk mirëpresin veç studentë apo të rinj të interesuar në teknologji dhe inovacion: artistët e rinj, të rinj të talentuar kanë hapësirën për të zhvilluar pasionet e tyre.

Cilat janë risitë, që sjell ky projekt?

BiblioTech vjen nën sloganin Friendly WiFi, që do të thotë se përdoruesit janë të mbrojtur nga shfaqja e përmbajtjeve të papërshtatshme dhe abuzive, që qarkullojnë shpesh në internet. Përmes Friendly WiFi e cila është një nismë e ngritur dhe implementuar në Tiranë nga Bashkia, pajisjet e përdorura në hapësirat e mbuluara me këtë shërbim do të kenë një filtër, që ofron siguri, gjatë lundrimit në internet.

Si do të funksionojë mirëbajtja e këtyre ambienteve?

Bibliotekat do të kenë staf përgjegjës të trajnuar, të cilët do të kujdesen për mbarëvajtjen e pajisjeve si edhe për të ndihmuar të gjithë ata që i frekuentojnë. Gjithashtu, ata do të ndihmojnë qytetarët në rastet kur do të hasin vështirësi në përdorim.

Kur do të lançohet BiblioTech?

Lançimi është planifikuar në muajin shtator. Mund të kemi ndryshime vetëm në rast të përkeqësimit të situatës, për shkak të pandemisë COVID-19.

Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.

Mund të kontribuoni KETU. Falemnderit.

Must watch
Business Mag Nr. #34 - Mars 2024

Për një vit të mbarë!

Viti 2024 ka nisur me sfidat dhe mundësitë e tij. Ndërsa kompanitë do të duhet të përballen me disa ndryshime ligjore dhe njëkohësisht trendet e tregjeve: si rritje çmimesh dhe rritje e kostos së fuqisë punëtore, startupet janë para mundësive dhe një klime favorizuese. Thirrje të shumta janë hapur në fushën e biznesit, kulturës dhe ideve të gjelbërta. Ndër më të rëndësishmit, programi i qeverisë për financimin e 80 startupeve në tre faza zhvillimi të tyre

Për të kuptuar rëndësinë e bizneseve të reja, veçanërisht në teknologji, mjafton të shohim që edhe sipërmarrje të konsoliduara vendase, si një grup kompanish si Balfin, kanë një vëmendje të theksuar tek startupet. Z. Samir Mane, President i këtij grupi, prej kohësh ka treguar interes, duke i mbështetur, por edhe duke investuar në një prej startupeve që pritet të sjellë revolucion në bio-inxhinieri. Vëmendja tek risia dhe inovacioni vlerësohet të jetë një nga arsyet kryesore, përse audienca jonë e zgjodhi në kompeticionin tonë të dhjetorit si Sipërmarrësi i Vitit. Në një intervistë ekskluzive, z. Mane tregon për ne copëza domethënëse nga …

Shiko më shumë
Na ndiqni në rrjetet sociale
0