Start-upet, të cilat arrijnë vlerën mbi 1 miliard dollarë marrin titullin “Një-brirësha” ose “Unicorn” në gjuhën angleze. Ky term i përdorur në botën financiare tregon fuqinë dhe synimin që duhet të ketë një biznes start-up për t’u quajtur i suksessshëm.
Faqja e njohur money.co, me bazë në Angli ka analizuar të dhënat nga kompania CB Insights nga Janari 2010 deri në Shtator të 2021-it në lidhje me numrin e bizneseve që kanë arritur ta nisin nga zero për të kapur vlerën 1 miliard dollarë.
Nga analiza e të dhënave bëhet me dije se janë 847 biznese që e kanë arritur këtë objektiv me një vlerë totale prej 2,74 trillionë dollarë,
Numri më i lartë i tyre është në Amerikë, ndërsa pesë vendet e para i plotëson Kina, India, Anglia dhe Gjermania.
Një biznes duhet të krijojë inovacion në sektorin e tij, si dhe të vijë me produkte që bëjnë revolucione në industri të tëra.
Sipas analizës në fushën e teknologjisë financiare, start-upet kanë shkëlqyer më shumë, ndjekur nga sektori i shërbimeve në internet dhe programeve softuerike.
Tregtia elektronike, inteligjenca artificiale dhe shëndetësia janë disa fusha të tjera, ku sipërmarrës të suksesshëm kanë arritur të krijojnë kompani që vlejnë miliarda dollarë.
Të dhënat tregojnë se Korriku është muaji më i frytshëm, ku janë themeluar shumica e bizneseve që kanë arritur statusin “Një-brirësh” nga 2010 deri në 2021. Më pas vjen Shtatori, ndjekur nga Prilli dhe Maji.
Salman Haqqi, ekspert i financave personale në money.co.uk, jep disa udhëzime se çfarë duhet marrë parasysh kur kërkoni një kredi për të financuar biznesin tuaj. Këshillat e tij janë të thjeshta dhe efikase.
Jini transparent
Është e rëndësishme të bëni një plan biznesi konçiz. Ai duhet të përcaktojë se si biznesi do të arrijë realisht objektivat e dëshiruara në afatshkurtër dhe afatgjatë dhe se si do të shpenzohet çdo qindarkë e kredisë bankare përgjatë fazave të ndryshme të rritjes së pritshme.
Jini të vetëdijshëm për marrëveshjet e huasë
Disa banka do të insistojnë në një sërë kushtesh të panegociueshme përpara se t’ju japin kredinë e biznesit. Kjo mund të përfshijë pamundësinë për të marrë kredi shtesë, pamundësinë për të shitur asete specifike dhe pamundësinë për të paguar dividentë në para për një periudhë të caktuar. Kini parasysh çdo kusht kredie përpara se të bini dakord për një kredi biznesi.
Kërkoni këshilla të ekspertëve
Tregu i kredive të biznesit (si shumë të tjerë) është shumë i trazuar për momentin për shkak të pasigurisë ekonomike të shkaktuar nga pandemia COVID-19. Nëse jeni duke luftuar për të gjetur fonde, merrni parasysh konsultimin me një ekspert të kualifikuar për t’ju ndihmuar në procesin e aplikimit për kredi dhe analizës.
Shtetet me më shumë “Një-brirësha”
SHBA 424
Kina 165
India 41
Anglia 33
Gjermania 19
Sektorët me më shumë “Një-brirësha”
Teknologji Financiare 167
Shërbimet e internetit dhe programet softuerike 144
Tregtia elektronike 88
Inteligjenca Artificiale 71
Shëndetësia 57
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
