Nga Riadi në Tiranë, si “FII Europe” mund ta kthejë Shqipërinë në një qendër të re të investimeve globale

Pas viteve me pjesëmarrje simbolike në samite ndërkombëtare, këtë herë Shqipëria erdhi me pritshmëri të qarta dhe ambicie të matshme në “Future Investment Initiative Europe”, forumin ekonomik që u zhvillua në Tiranë më 16 dhe 17 maj. Ky event dyditor u zhvillua në sinkron me Samitin e Komunitetit Politik Europian (EPC), për të siguruar pjesëmarrjen e përbashkët të liderëve si presidenti francez Emmanuel Macron. Ndër figurat e tjera të njohura që morën pjesë ishin Yasir Al-Rumayyan (Guvernator i Fondit Publik të Investimeve të Arabisë Saudite), Mohamed Alabbar (Themelues i kompanisë Emaar), Matteo Renzi (ish-Kryeministër i Italisë), Linda Rama (ekonomiste dhe këshilltare strategjike), Sarah Al Amiri (Ministre për Teknologjitë e së Ardhmes në Emiratet e Bashkuara Arabe), biznesmeni shqiptar Samir Mane ( si përfaqësues i zërit të biznesit të rajonit)  etj.

Me tre tryeza diskutimesh në fokus, dy ishin të dedikuara për axhendën ekonomike të reformave dhe politikat për të rinjtë, një sinjal se Shqipëria synon të jetë më shumë se një vëzhguese pasive në këto takime.

Një nga prioritetet kryesore të delegacionit shqiptar ishte përfshirja në iniciativën “Një hapësirë europiane e arsimit”, që do t’u mundësonte studentëve dhe të rinjve shqiptarë të lëviznin më lirshëm për studim dhe punësim brenda vendeve të BE-së. Në të njëjtën kohë, u synua zgjerimi i pjesëmarrjes në programet e BE-së për formimin profesional dhe zhvillimin e të rinjve.

Lexo edhe: Samir Mane, i vetmi sipërmarrës nga rajoni në panelet e diskutimit të samitit global FII PRIORITY Europe që po organizohet në Tiranë.

Presidenti Emmanuel Macron, në fjalimin e tij, vlerësoi lidershipin shqiptar dhe inkurajoi investimet në Shqipëri:“Jam shumë i lumtur që jeni këtu sepse në Shqipëri, keni hyrjen në Ballkanin Perëndimor dhe më gjerë, një pikë kyçe në Mesdhe dhe Europë. Prandaj ju inkurajoj të investoni në Shqipëri, sepse ka një udhëheqje të fortë. Dhe nuk e them këtë vetëm sepse Edi është miku im, por sepse ka sjellë rezultate. Në dy vitet e ardhshme, me një mandat të qartë, Shqipëria do të bëhet pjesë e BE-së. Ne, europianët, do të japim tani rezultat, dhe me bashkëpunimin e fortë mes Francës dhe Gjermanisë, do të bëjmë gjithçka për të realizuar axhendën që kemi diskutuar,” përfundoi Macron.

Mbështetja e Kushner-it
Jared Kushner, dhëndri i Presidentit amerikan Donald Trump dhe CEO i “Affinity Partners”, iu drejtua samitit nëpërmjet një lidhjeje virtuale, ku shprehu vlerësimin për kryeministrin Rama dhe  ndau detaje për planet e tij për një resort luksoz në ishullin e Sazanit:

“U tërhoqa nga rajoni dhe nga trendet demografike. Kaluan një vit duke studiuar tregun dhe demografinë. Mjedisi rezultoi perfekt. Shumë më kanë pyetur pse po investoj në Shqipëri. Shumë veprime qeveritare po ndryshojnë klimën e jetesës që po përkthehet në paga më të larta dhe më shumë mirëqenie. Është një vendndodhje ideale – vetëm disa kilometra nga Italia, dhjetë minuta nga aeroporti i ri. Do të ndërtojmë diçka spektakolare dhe do ta prezantojmë së shpejti. Kush do ta vizitojë resortin? Së pari, unë dhe bashkëshortja ime. Do të ndërtojmë një komunitet të mrekullueshëm dhe do të tërheqim markat më prestigjioze të botës.”

Në tetë vite të këtij samiti , nga Riadi, Majemi, Hong-Kong, deri në Paris, Poznan e së fundmi Tirana, janë lidhur marrëveshje me vlerë mbi 200 miliardë dollarë, duke e kthyer këtë forum në një nga platformat më të rëndësishme për lidhjen e kapitaleve globale me politikat zhvillimore. Shqipëria synoi të përfitonte nga ky ndikim, jo vetëm në aspekt imazhi, por përmes mbështetjes konkrete financiare dhe teknike.

FII PRIORITY Europe Summit është pjesë e një serie forumesh globale që promovojnë dialogun ndërsektorial dhe nxitin veprimin konkret për të adresuar sfidat më urgjente të kohës sonë, përfshirë ndryshimet klimatike, zhvillimin e qëndrueshëm dhe transformimin teknologjik.