Disa nga emrat më të mëdhenj të teknologjisë në SHBA, përfshirë Mark Zuckerberg (Meta), Tim Cook (Apple), Sundar Pichai (Google), Elon Musk (Tesla) dhe Jeff Bezos (Amazon), mbështetën Presidentin Donald Trump me donacione dhe pjesëmarrje në inaugurimin e tij. Por tre muajt e parë të mandatit të tij të ri kanë rezultuar katastrofikë për pasurinë dhe kompanitë e tyre.
Sipas të dhënave të publikuara nga Bloomberg Billionaires Index, këto kompani kanë humbur në total rreth 1.8 trilionë dollarë në vlerë tregu që nga fillimi i vitit 2025, pavarësisht një rikuperimi të lehtë të tregjeve pas pezullimit të përkohshëm të disa tarifave nga Trump.
Pasojat e tarifave
Trump kishte premtuar përfitime për teknologjinë amerikane, si lehtësim të rregulloreve dhe mbrojtje nga konkurrenca e huaj. Por tarifat e vendosura nga administrata e tij, veçanërisht ndaj Kinës, kanë sjellë jo vetëm kosto të reja për zinxhirët e furnizimit, por edhe paqartësi të madhe ekonomike. Tarifat ndaj Kinës tani do të rriten në 125%, nga 104%.
Sipas një raporti nga UBS, të ardhurat e sektorit teknologjik mund të bien deri në 25%, si rezultat i drejtpërdrejtë i këtyre politikave.
Humbjet personale të miliarderëve të teknologjisë
-
Elon Musk ka qenë më i godituri, pasuria e tij është zvogëluar me 143 miliardë dollarë, ndërsa aksionet e Teslës kanë rënë me 28%, duke humbur 376.6 miliardë në kapitalizim tregu. Ai kishte dhuruar mbi 290 milionë dollarë për rizgjedhjen e Trump dhe ka qenë i përfshirë në politikat e brendshme.
-
Mark Zuckerberg, i cili kishte bërë donacione për fondin inaugurues të Trump dhe kishte emëruar figura pro-Trump në Meta, ka humbur 26.5 miliardë dollarë nga pasuria e tij. Vlera e tregut të kompanisë ra me 35.8 miliardë dollarë.
-
Jeff Bezos gjithashtu mbështeti publikisht Trump pas fitores së tij dhe Amazon kontribuoi me 1 milion dollarë në inaugurim. Por aksionet e Amazon kanë rënë me 13%, duke i shkaktuar Bezos një humbje personale prej 47.2 miliardë dollarësh.
-
Sundar Pichai (Google) gjithashtu dhuroi për fondin inaugurues dhe u takua me Trump, por aksionet e Google kanë rënë me 16.2%, duke ulur vlerën e kompanisë me 386.7 miliardë dollarë.
-
Tim Cook (Apple) dhuroi personalisht 1 milion dollarë, dhe Apple premtoi investime në SHBA që Trump i konsideroi fitore politike. Megjithatë, për shkak të varësisë së madhe nga tregjet aziatike, Apple ka humbur 684 miliardë dollarë në vlerë tregu, një rënie prej 18.5% në aksione.
Ndërsa liderët e teknologjisë dikur mendonin se afërsia me pushtetin do të sillte favore ekonomike, realiteti po tregohet i dhimbshëm. Tarifat e reja, pasiguria tregtare dhe humbjet miliardëshe kanë vënë në pikëpyetje jo vetëm përfitimet afatshkurtra, por edhe vetë strategjitë e aleancave politike. Në fund të ditës, tregu nuk njeh as parti dhe as premtime, njeh vetëm bilancet.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
