Në një atmosferë festive dhe dinamike, ka nisur ditën e djeshme edicioni i tretë i Automotive Fair Albania, ngjarja më e rëndësishme automobilistike në vend, që do të zgjasë deri më 30 mars në sheshet “Nënë Tereza” dhe “Italia” në zemër të Tiranës. Me një ekspozitë të automjeteve RETRO dhe praninë e aktorëve kryesorë të industrisë, edicioni i sivjetshëm konfirmon ambicien për të kthyer Shqipërinë në një pikë referimi për zhvillimet më të fundit të sektorit.
Lexo gjithashtu: Vjen edicioni i tretë i Automotive Fair Albania!
Ceremonia zyrtare e hapjes u shënua nga fjalimet e organizatorëve dhe përfaqësuesve të lartë kombëtarë dhe ndërkombëtarë, të cilët theksuan rëndësinë në rritje të këtij eventi si një platformë bashkëpunimi mes inovacionit, qëndrueshmërisë dhe pasionit për automjetet. Aktiviteti u shoqërua me muzikë live nga MR COOL dhe AD DISHA, ndërsa pjesëmarrësit patën mundësinë të vizitojnë zonat ekspozuese dhe të marrin pjesë në një koktej mirëseardhjeje.
Gjatë katër ditëve të panairit, publiku do të përjetojë një kalendar të ngjeshur ngjarjesh, ku spikat gara “Best Young Driver”, që zhvillohet të premten me pjesëmarrje të të rinjve të apasionuar pas drejtimit, si dhe parada madhështore me automjete që vijnë nga Italia për të marrë pjesë në “Tirana Grand Prix”. Kjo e fundit do të hapet me një ceremoni të veçantë të premten në mbrëmje, duke sjellë spektakël dhe adrenalinë në rrugët kryesore të Tiranës.
E shtuna do të sjellë dy fazat e para të garës “Grand Prix”, si dhe një paradë inovative ku markat më të njohura automobilistike do të prezantojnë teknologjitë më të fundit dhe vizionin për automjetet e së ardhmes. Ndërsa e diela do të kulmojë me fazën finale të garës, ndarjen e çmimeve dhe paradën përmbyllëse, përpara se gjithçka të mbyllet me një ceremoni elegante në Pallatin e Brigadave.
Automotive Fair Albania III nuk është thjesht një panair makinash, është një përvojë që bashkon historinë, teknologjinë dhe pasionin për drejtimin në një event që sjell bashkë profesionistë, entuziastë dhe publikun e gjerë. Me pjesëmarrjen e aktorëve vendorë dhe ndërkombëtarë, ky është një moment kyç për të reflektuar mbi të ardhmen e mobilitetit në Shqipëri dhe më gjerë.
Për më shumë informacion mbi programin dhe për të ndjekur aktivitetet live, vizitoni: www.automotivefairalbania.al
https://www.instagram.com/p/DHwGnNVtsoW/
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
