Kompania e Elon Musk, Neuralink, ka njoftuar se do të fillojë prodhimin masiv të “Brain-Computer Interface (BCI)” dhe planifikon të kalojë në një procedurë kirurgjikale tërësisht të automatizuar gjatë vitit 2026, sipas një postimi të Musk në platformën sociale X.
Implanti është zhvilluar për të ndihmuar njerëzit me dëmtime të palcës kurrizore dhe kushte të tjera neurologjike. Pacienti i parë që e ka përdorur pajisjen ka arritur të luajë videolojëra, të shfletojë internetin, të postojë në rrjetet sociale dhe të lëvizë kursorin në laptop vetëm me mendimin.
Neuralink filloi provat klinike njerëzore në vitin 2024, pasi adresoi shqetësimet e sigurisë të ngritura nga Administrata Amerikane e Ushqimit dhe Barnave (FDA), e cila kishte refuzuar fillimisht kërkesën e saj në vitin 2022. Sipas kompanisë, deri në shtator 2025, 12 persona me paralizë të rëndë në mbarë botën kanë marrë implantet dhe po i përdorin ato për të kontrolluar pajisje digjitale dhe fizike vetëm përmes mendjes.
Kompania gjithashtu ka përfituar mbështetje të konsiderueshme financiare, duke siguruar 650 milionë dollarë në një raund investimesh në qershor të 2025, gjë që mundëson zgjerimin e prodhimit dhe avancimin e teknologjisë kirurgjikale. Me kalimin në një sistem kirurgjik të automatizuar dhe prodhimin masiv, Neuralink synon të bëjë implantet e trurit më të qasshme për pacientët që mund të përfitojnë nga kjo teknologji revolucionare.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
