Meta ka përditësuar politikat e saj të privatësisë për syzet inteligjente Ray-Ban Meta, duke i dhënë vetes më shumë të drejta mbi të dhënat që mund të ruajë dhe përdorë për të trajnuar modelet e saj të inteligjencës artificiale.
Kompania u ka dërguar një email pronarëve të Ray-Ban Meta, ku i njofton se veçoritë me inteligjencë artificiale do të jenë tani aktive si parazgjedhje në syze, sipas raportimit të The Verge. Kjo do të thotë se AI e Meta do të analizojë fotot dhe videot e bëra me syze, kur këto veçori janë të aktivizuara. Për më tepër, Meta do të ruajë regjistrimet e zërit të përdoruesve për të përmirësuar produktet e saj — pa ofruar mundësinë për t’u tërhequr nga ky proces. Megjithatë, për të qenë të qartë, syzet Ray-Ban Meta nuk regjistrojnë vazhdimisht gjithçka që ndodh rreth përdoruesit. Pajisja ruan vetëm fjalët e shqiptuara pasi përdoruesi thotë komandën “Hey Meta”. Në njoftimin e privatësisë për shërbimet zanore në pajisjet e veshjes, Meta shpjegon se transkriptimet dhe regjistrimet e zërit mund të ruhen deri në një vit për të ndihmuar në përmirësimin e produkteve të saj. Nëse dikush nuk dëshiron që Meta të përdorë regjistrimet e tyre për trajnimin e AI, do të duhet t’i fshijë ato manualisht nga aplikacioni shoqërues Ray-Ban Meta.
Lexo edhe:Shteti shqiptar investon 10 mln $ për startupin inovativ të Mira Muratit
Kjo ndryshon kushtet në mënyrë të ngjashme me atë që bëri kohët e fundit Amazon me përdoruesit e pajisjeve Echo. Prej muajit të kaluar, Amazon ka kaluar të gjitha komandat e Echo nëpërmjet cloud-it, duke hequr opsionin më të favorshëm për privatësinë, që përpunonte zërin në mënyrë lokale. Kompani si Meta dhe Amazon janë të etura të mbledhin sa më shumë të dhëna zanore, pasi këto janë burime të vlefshme për trajnimin e produkteve të tyre gjenerative me inteligjencë artificiale. Duke pasur një gamë më të gjerë regjistrimesh audio, AI e Meta mund të përmirësojë aftësinë për të kuptuar thekse, dialekte dhe mënyra të ndryshme të të folurit.Megjithatë, përmirësimi i AI vjen me një kosto për privatësinë e përdoruesve. Për shembull, një përdorues mund të mos e kuptojë që kur bën një foto të një të afërmi me syzet Ray-Ban Meta, fytyra e tij mund të përfundojë në të dhënat që përdoren për trajnimin e inteligjencës artificiale të Meta. Mbledhja e të dhënave nga Meta nuk është diçka e re. Kompania tashmë trajnon modelet e saj Llama AI mbi postimet publike që përdoruesit amerikanë ndajnë në Facebook dhe Instagram.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
