Qeveria ka nëshkruar në 31 korrik marrëveshjen me kompaninë franceze ‘Voltalia’ për ndërtimin e parkut fotovoltaik të Karavastasë, për prodhimin e energjisë elektrike përmes paneleve diellore.
Në një ceremoni në kryeministri, ministrja e Infrastrukturës Belinda Balluku njoftoi se kompania franceze u shpall fituese e ankandit ndërkombëtar, ku morën pjesë 30 kompani. Kompania franceze do të fillojë investimet duke nisur nga muaji shtator.
Kompania e ‘Voltalias’ propozoi çmimin prej 24.89 euro për megavat, çmim i cili sipas ministres Balluku, është i jashtëzakonshëm.
Lexoni: 2020 – Viti i projekteve të mëdha në sektorin Energjitik
Ndërsa kryeministri Edi Rama e cilësoi si një ditë të mirë për ekonominë shqiptare sepse ky është një investim i huaj, që do të investojë në Shqipëri më shumë se 100 milionë euro. Edi Rama tha se kompania prestigjioze do të ndihmojë të hedhë më shumë dritë mbi Shqipërinë në Francë dhe tek investitorët francezë.
Parku fotovoltaik i Karavastasë do të jetë i dyti në vend pas atij të Akërnisë, tenderi për të cilin është bërë që në vitin 2018. Por punimet në Akërni nuk kanë nisur ende për shkak të negociatave ende të papërfunduara me kompanitë fituese.
Kompania ‘Voltalia’ është themeluar në vitin 2005 në Francë dhe është e fokusuar në sektorin e energjisë së rinovueshme, të diellit, erës e ujit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
