Shqipëria po hedh hapa konkretë drejt heqjes së tarifave roaming me vendet e Bashkimit Europian. Ministria e Infrastrukturës dhe Energjisë ka nxjerrë për konsultim publik ndryshime në ligjin “Për Komunikimet Elektronike”, me synimin për të përafruar legjislacionin shqiptar me atë të BE-së dhe për të zbatuar regjimin “Roaming Like At Home”.
Objektivi i këtij procesi është që brenda vitit 2026, qytetarët shqiptarë të mund të përdorin telefonin, mesazhet dhe internetin në vendet e BE-së pa asnjë kosto shtesë, njësoj si brenda territorit të Shqipërisë. I njëjti përfitim do të vlejë edhe për qytetarët e Bashkimit Europian që vizitojnë vendin tonë.
Projektligji parashikon gjithashtu uljen e kostove teknike mes operatorëve telefonikë, në mënyrë që përfitimi të reflektohet realisht te konsumatorët. Një risi e rëndësishme është edhe vendosja e gjobave për operatorët që nuk do të zbatojnë rregullat e reja të roaming.
Kjo nismë konsiderohet një hap i rëndësishëm drejt integrimit të Shqipërisë në tregun unik digjital të Bashkimit Europian, duke lehtësuar lëvizjen e lirë të qytetarëve, ulur kostot e komunikimit dhe përmirësuar klimën për bizneset dhe investimet.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
