Guvernatori i Bankës së Shqipërisë Gent Sejko ka ndarë tre çmime për temat më të mira të diplomave në ekonomi. Në konkurs marrin pjesë studentë brenda dhe jashtë vendit, për punë kërkimore-shkencore në çështje të lidhura me ekonomiksin monetar e ndërkombëtar, stabilitetin e çmimeve dhe atë financiar, integrimin ekonomik etj.
Çmimi i parë iu dha Vasilika Lushkës, studente në Universitetin e Tiranës, për temën e masterit shkencor “Analiza e strukturës së tregut të sigurimeve në Shqipëri. Rregullimi dhe matja e konkurrencës në këtë treg”.
Një studim që sjell kontribut në fushën e financës, veçanërisht në aspektin e mbikëqyrjes financiare, duke paraqitur një analizë të detajuar të përqendrimit në sektorin e tregut të sigurimeve, si për sigurimet e jetës ashtu edhe ato të jojetës.
Çmimin e dytë e mori Joana Gjinopulli, studente në Universitetin e Tiranës, për temën e saj të masterit mbi “Vlerësimin e efekteve makroekonomike nga ndryshimet klimatike mbështetur në modelet Error Correction Mechanism dhe 2 Stage Least Square: Rasti i Shqipërisë”. Tema merr në shqyrtim një ndër sfidat më të mëdha globale, atë të ndryshimeve klimatike. Ajo analizon në mënyrë empirike ekzistencën e një ekuilibri afatgjatë mes rritjes ekonomike dhe ndryshimeve klimatike për rastin e Shqipërisë. Me çmimin e tretë u vlerësua Denisa Dervishi, studente në Universitetin Epoka, për temën e saj të diplomës mbi “Teorinë e kërkesës për para dhe aplikimi për Shqipërinë nën regjimin e inflacionit të shënjestruar”.
Çmimet u ndanë gjatë takimit që Guvernatori Sekjo zhvilloi me gazetarë, analistë dhe drejtues të medias.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
