Në datën 10 shtator, Piramida e Tiranës u mbush me një frymë krijimtarie dhe inovacioni. Në kuadër të vazhdimit të Product Launch, të organizuar nga AlbaniaTech në bashkëpunim me startup-in n’Arte dhe me mbështetjen e One Albania, u prezantua një platformë e re që synon të vendosë artin shqiptar në qendër të vëmendjes globale.
n’Arte është një hapësirë digjitale e krijuar për të bashkuar artistë, koleksionistë, galeri dhe dashamirës arti, duke e çuar artin shqiptar përtej kufijve. Platforma synon të ofrojë jo vetëm një treg virtual për krijimtarinë, por edhe një urë lidhëse për dialog, bashkëpunim dhe promovim ndërkombëtar.
Lexo edhe: n’Arte në “Product Launch”, një kapitull i ri për artin shqiptar në epokën digjitale!
Startup-i u prezantua nga bashkëthemelueset Zhdanova dhe Paskualina Lleshaj, të cilat ndanë me audiencën historitë e tyre personale dhe motivimin pas kësaj nisme. Zhdanova tregoi se vjen nga një familje artistësh dhe gjithmonë ka ndjerë një lidhje të veçantë me artin. “Edhe pse nuk u bëra vetë artiste, doja të gjeja mënyrën time për të qenë pjesë e kësaj bote. Me n’Arte, synoj të ndërtoj një urë ku arti shqiptar të ketë vendin e tij të merituar,” – u shpreh ajo. Ajo gjithashtu theksoi se platforma është e hapur për pikturën, por jo vetëm. Qëllimi është të përfshihen edhe forma të tjera arti që i japin zë krijuesve shqiptarë, duke u ofruar një mundësi reale për të depërtuar në tregjet ndërkombëtare.
Një hapësirë për të gjithë:
-
Artistët do të kenë mundësi të ndajnë krijimtarinë e tyre dhe të arrijnë një audiencë më të gjerë.
-
Koleksionistët do të lidhen me vepra autentike shqiptare dhe do të zbulojnë talente të reja.
-
Galeritë dhe dashamirësit e artit do të kenë një kanal të ri për të eksploruar, promovuar dhe investuar.
Eventi nuk ishte vetëm një prezantim i një startup-i, por një thirrje për të ndërtuar së bashku një të ardhme ku arti shqiptar gjen vendin e vet në botën digjitale. n’Arte është dëshmia se si teknologjia dhe krijimtaria mund të ecin krah për krah, duke i dhënë artit shqiptar jo vetëm një platformë, por edhe një horizont të ri. Ky ishte një Product Launch që i hapi rrugë një kapitulli të ri për artin dhe inovacionin shqiptar.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
