“Është e rrezikshme, askush nuk mund ta kontrollojë”
Elon Musk dhe disa drejtues në industrinë e teknologjisë kanë bërë thirrje për një pauzë gjashtëmujore të zhvillimit të inteligjencës artificiale.
Në këtë nismë përfshihet edhe bashkëthemeluesi i Apple, Steve Wozniak. Ata bëjnë thirrje për një pauzë për të zhvilluar AI (inteligjenca artificiale). Daily Mail shkruan se, “ata druhen se përbën një ‘rrezik të thellë për shoqërinë dhe njerëzimin’ dhe mund të ketë efekte ‘katastrofike”.
Në një letër për Institutin e Jetës, Musk dhe të tjerët theksuan se, njerëzimi nuk e di ende shtrirjen e plotë të rrezikut të përfshirë në avancimin e teknologjisë. Ata po kërkojnë nga të gjithë laboratorët e AI që të ndalojnë zhvillimin e produkteve të tyre për të paktën gjashtë muaj.
Qeveritë e vendeve përkatëse duhet të ndërhyjnë nëse një laborator e refuzon këtë nismë. Frika e Musk është se teknologjia do të bëhet aq e avancuar, saqë nuk do të kërkojë më ndërhyrje njerëzore. Është një frikë që pranohet nga ai kur tha në fillim të marsit se, “teknologjia mund të zhvillohet dhe shfrytëzohet për të kryer sulme kibernetike ‘të përhapura’.
“Sistemet e fuqishme të AI duhet të zhvillohen vetëm pasi të kemi besim se efektet e tyre do të jenë pozitive dhe rreziqet e tyre do të jenë të menaxhueshme”, thuhet në letër.
Pak kohë më parë, Europol ka shprehur shqetësime të forta etike dhe ligjore rreth AI-së së avancuar, si ChatGPT, duke paralajmëruar për keqpërdorimin e mundshëm të sistemit.
Që nga publikimi i tij vitin e kaluar, ChatGPT i OpenAI i mbështetur nga Microsoft ka nxitur rivalët të lançojnë produkte të ngjashme dhe kompanitë ta integrojnë atë ose teknologji të ngjashme në aplikacionet dhe produktet e tyre.
Musk ka vite që po përpiqet të ndalojë rritjen e shpejtë të teknologjisë AI. Në vitin 2017, Musk paralajmëroi se njerëzimi po ‘thirrte demonin’ në ndjekjen e teknologjisë.
Lexo: Inteligjenca Artificiale mund të zëvendësojë ekuivalentin e 300 milionë vendeve të punës
Musk ishte një nga themeluesit e OpenAI, kompania që krijoi ChatGPT në 2015. Synimi i tij ishte që ajo të funksiononte si një organizatë jofitimprurëse e përkushtuar për të hulumtuar rreziqet që mund të paraqesë AI për shoqërinë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
