Telefonat tanë shpesh fajësohen për stresin dhe ankthin, por një studim i ri sugjeron se jo çdo “scroll” është armik i qetësisë mendore. Sipas një kërkimi të publikuar nga American Psychological Association, shikimi i videove frymëzuese për vetëm disa minuta në ditë mund të ulë stresin po aq sa meditimi.
Studimi zbuloi se personat që shikonin video të shkurtra inspiruese për pesë ditë rresht përjetuan ulje të ndjeshme të stresit për deri në 10 ditë më pas, i njëjti efekt u vu re edhe te ata që praktikonin meditimin. Faktori kyç që qëndron pas këtij përmirësimi? Ndjenja e shpresës.
Eksperimenti përfshiu rreth 1,000 të rritur dhe u zhvillua në një nga periudhat më stresuese të vitit, mes Ditës së Falënderimeve dhe Krishtlindjeve. Pjesëmarrësit u ndanë në grupe: disa shikonin video frymëzuese, disa përmbajtje humoristike, të tjerë dëgjonin meditime të drejtuara, ndërsa një grup përdorte telefonin pa kufizime të caktuara.
Rezultatet treguan se videot komike nuk patën ndikim real në uljen e stresit. Ndërsa ata që konsumuan përmbajtje frymëzuese, histori reale të njerëzve që kishin kapërcyer vështirësi të mëdha, ndiheshin më optimistë dhe më të aftë për të përballuar presionin e përditshëm.
Sipas autores kryesore të studimit, shpresa nuk është vetëm një ndjesi momentale, por një mekanizëm që i ndihmon njerëzit të përballen më mirë me sfidat. Megjithatë, studiuesit theksojnë se kjo metodë nuk duhet të zëvendësojë meditimin apo teknikat e tjera të provuara për menaxhimin e stresit, por mund të shërbejë si një mjet shtesë i thjeshtë dhe i aksesueshëm.
Mesazhi është i qartë, ndonjëherë, disa minuta frymëzim në ekran mund të bëjnë më shumë mirë sesa mendojmë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
