Arabia Saudite, shteti më i madh i rajonit të Azisë Jugperëndimore dhe Egjipti i lashtë që ndodhet në Afrikën veriore, janë dy shtetet që po i shtohen gjeografisë së eksporteve të mollës “Made in Albania”, që tashmë shiten rregullisht në tregjet e Greqisë, Bullgarisë e Maqedonisë.
Drejtori i Bujqësisë në Korçë, Vullnet Gjolla tha se tregjet e huaja po rritin interesin për të eksportuar mollët e rajonit tonë. Kjo sipas tij, falë promovimit më të mirë që po bëjmë në panaire dhe aktivitete të ndryshme ndërkombëtare, për të rritur informacionin dhe vlerat që kanë prodhimet bujqësore shqiptare.
Gjolla tregon se, ne njihemi me kërkesat e tregut të huaj dhe i orientojmë fermerët të përmbushin kërkesat e tregjeve të huaja me qëllim nxitjen e eksportit.
“Standardizimi i prodhimit është një kriter i pa negociueshëm, ndaj po punojmë shumë për të garantuar eksporte gjithëvjetore dhe zhvilluar ekonominë,” thotë ai.
Vetëm gjatë këtij viti janë eksportuar mbi 3000 ton mollë të Korçës prej të cilave 2400 ton mollë për përpunim industrial dhe rreth 1 000 të tjera për konsum.
Sipas të dhënave zyrtare në Shqipëri mbillen rreth 30.195.000 rrënjë mollë, të cilat japin një prodhim prej 73.303 ton. Varietetet që prodhohen më së shumti në Shqipëri, tradicionale janë “Starking” që përbëjnë 52% dhe Golden Delicious 42%. Ndërsa varietetet e tjera të mollëve qe janë tradicionale te rritura edhe në rajon janë Gala, Mutsu dhe mollë Granny Smith.
Burimi: ata.gov.al
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
