Çdo larje rrobash fsheh një problem që pak e mendojnë: miliona fibra plastike të padukshme që përfundojnë në lumenj dhe oqeane. Një veshje sintetike mund të çlirojë deri në 1.5 milionë mikrofibra gjatë një cikli të vetëm larjeje, ndërsa studimet tregojnë se lavatriçet shtëpiake janë burimi kryesor i mikroplastikës në detra.
Ironikisht, zgjidhja për këtë ndotje erdhi pikërisht nga jeta detare.
Tre shpikës të rinj nga Case Western Reserve University në Ohio, SHBA, u frymëzuan nga mënyra se si peshqit manta ushqehen në oqean. Goja e tyre në formë koni krijon rryma të vogla rrotulluese që kapin planktonin pa u bllokuar. Duke parë se filtrat tradicionalë të lavatriçeve shpesh bllokohen dhe humbin efikasitetin, ata projektuan një alternativë që imiton këtë mekanizëm natyror.
Lexo gjithashtu: Demis Hassabis: AI mund të të bëjë më të zgjuar ose të ta bllokojë mendjen, varet si e përdor
Rezultati është filtri i patentuar Vortx, i cili krijon vorbulla të vogla brenda sistemit, duke bllokuar mikroplastikat dhe duke i drejtuar ato drejt një kapsule të zëvendësueshme. Sipas krijuesve, teknologjia është deri në 300% më efektive sesa filtrat klasikë.
CEO Max Pennington, së bashku me bashkëthemeluesit Chip Miller dhe David Dillman, krijuan startup-in Cleanr për ta sjellë produktin në treg. Pajisja vendoset mbi një lavatriçe standarde dhe në SHBA shitet për 359 dollarë (269 paund).
Edhe pse çmimi aktual mbetet i lartë për shumë familje dhe kapsulat e përdorura kërkojnë menaxhim të kujdesshëm, themeluesit shpresojnë që filtrat e mikrofibrave të bëhen të detyrueshëm në lavatriçet e reja. Tashmë, gjashtë shtete amerikane, përfshirë Pennsylvania, Oregon dhe California, po diskutojnë ligje në këtë drejtim.
“Ligjvënësit po e kuptojnë se duhet ta ndalim problemin që në burim,” ka deklaruar Pennington.
Në një kohë kur mikroplastika është kthyer në një kërcënim global për ekosistemet dhe shëndetin e njeriut, kjo shpikje tregon se ndonjëherë përgjigjja për problemet moderne gjendet në mençurinë e natyrës. Nga deti në shtëpitë tona, biologjia e peshqve mund të jetë çelësi për ujëra më të pastër.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
