Meta po ndërton një nga qendrat më të mëdha të të dhënave për inteligjencën artificiale, të quajtur Hyperion, e cila pritet të furnizojë laboratorin e ri të AI-së të kompanisë me pesë gigavat (GW) fuqi kompjuterike, njoftoi CEO Mark Zuckerberg të hënën në një postim në platformën Threads.
Ky njoftim përfaqëson një tjetër hap të rëndësishëm të Metës për të marrë epërsinë ndaj OpenAI dhe Google në garën për AI. Pas rekrutimit të disa prej emrave më të njohur në fushë — si ish-CEO i Scale AI, Alexandr Wang, dhe themeluesi i Safe Superintelligence, Daniel Gross — Meta po përqendrohet tani tek fuqia e madhe kompjuterike e nevojshme për të trajnuar modelet më të avancuara të inteligjencës artificiale. Sipas Zuckerberg, Hyperion do të ketë një shtrirje aq të madhe sa do të mbulojë pothuajse të gjithë Manhatanin. Zëdhënësja e kompanisë, Ashley Gabriel, konfirmoi për TechCrunch se projekti po ndërtohet në Louisiana, me shumë gjasa në Richland Parish, ku Meta kishte shpallur më parë një investim prej 10 miliardë dollarësh për një qendër të dhënash. Gabriel shton se Meta planifikon të sjellë në funksion 2 GW kapacitet deri në vitin 2030, ndërsa në vitet në vijim ky kapacitet do të arrijë në 5 GW.
Zuckerberg gjithashtu bëri të ditur se Meta do të aktivizojë në vitin 2026 një superklaster me kapacitet 1 GW, të quajtur Prometheus, që do ta bëjë kompaninë ndër të parat në botën e teknologjisë që kontrollon një qendër të të dhënave me këtë përmasë. Prometheus ndodhet në New Albany, Ohio. Këto zhvillime e pozicionojnë Metën si një konkurrent gjithnjë e më serioz ndaj Google DeepMind, OpenAI dhe Anthropic, duke i dhënë kapacitetin e nevojshëm për të trajnuar dhe operuar modelet më të avancuara të AI-së. Në të njëjtën kohë, ky investim i mundëson kompanisë të tërheqë më shumë talente, që duan të punojnë në një ambient me infrastrukturë të klasit botëror.
Lexo edhe:Pse të ndjekësh “fiksimaxhinjtë” mund të jetë ideja më e mirë? Njihu me BoldCrest
Megjithatë, ky ndërtim i fuqishëm mund të ketë pasoja për komunitetet përreth. Prometheus dhe Hyperion do të konsumojnë energji sa për miliona shtëpi, gjë që mund të ndikojë ndjeshëm në furnizimin me ujë dhe energji elektrike në zonat fqinje. Një projekt i ngjashëm i Metës në Newton County, Georgia, ka shkaktuar tashmë mungesë uji në disa shtëpi, raportoi New York Times. Projekte të tjera të ngjashme mund të përballen me të njëjtat sfida. Kompania CoreWeave, që ofron kapacitete për AI në shkallë të lartë, po planifikon një zgjerim të qendrës së saj të të dhënave që pritet të dyfishojë nevojat për energji të një qyteti pranë Dallas, Texas, sipas Bloomberg. Megjithatë, teknologjia nuk po ngadalëson ritmin. Përveç Metës, projekte të tjera përfshijnë Stargate të OpenAI në bashkëpunim me Oracle dhe SoftBank, si dhe superkompjuterin Colossus të xAI, startup-i i Elon Musk. Ndërkohë, administrata e ish-Presidentit Donald Trump ka mbështetur fuqishëm ndërtimin e qendrave të të dhënave për AI. Trump ndihmoi në njoftimin e projektit Stargate dhe ka folur shpesh për nevojën për të zgjeruar infrastrukturën amerikane të AI-së.
Në një editorial për The Economist, Sekretari Amerikan i Energjisë, Chris Wright, bëri thirrje që SHBA të udhëheqë këtë “frontierë të re energji-intensive: inteligjencën artificiale”. Ai theksoi se AI transformon elektricitetin në “prodhimin më të vlefshëm të mundshëm: inteligjencën”, duke shtuar se qeveria federale do të përshpejtojë prodhimin e energjisë nga burime si qymyri, energjia bërthamore, gjeotermale dhe gazi natyror.
Nëse këto projekte vijojnë me këtë ritëm dhe mbështetje shtetërore, ekspertët parashikojnë që deri në vitin 2030, qendrat e të dhënave do të konsumojnë deri në 20% të energjisë në SHBA, nga vetëm 2.5% në vitin 2022. Pa një rritje të menjëhershme të prodhimit të energjisë, kjo mund të sjellë pasoja të mëdha për komunitetet vendase.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
