Mbyllja e aktivitetit të hotel Sheraton në Shqipëri, po shoqërohet me shumë pikëpyetje mbi arsyet e largimit, pikërisht në një periudhë kur qeveria pritet të aplikojë lehtësitë më të mëdha fiskale në këtë sektor.
Por, burime informale thonë se grupi i rrjetit të hoteleve ‘Marriott‘, i cili bleu rrjetin ‘Sheraton‘ pak vite më parë, po shpreh interes të dukshëm për të investuar në rajon, përfshirë edhe Shqipërinë e Kosovën. Marriott, ka tashmë një hotel të tij në Shkup të Maqedonisë.
Një investim i mundshëm, po nga i njëjti grup hotelier në Shqipëri, me gjithë përshtatjen me nivelin e kërkesës së brendshme, siguron një standard ndërkombëtar shërbimi, sipas operatorëve në këtë fushë.
Largimi i Sheraton Tirana u konfirmua për mediat shqiptare në fund të vitit të kaluar, nga grupi Marriott International, duke theksuar se prej 31 dhjetorit 2017 nuk menaxhon Sheraton Tiranën. Kompania nuk ka shpjeguar arsyet e mbylljes, duke theksuar se, “për çdo pyetje tjetër duhet t’i drejtoheni pronarëve, MAK- Albania’’. Kjo e fundit prej vitesh raporton humbje të mëdha financiare, çka duket se kanë sjellë pasiguri të mëdha edhe për hotel Sheraton.
Lexoni: https://businessmag.al/mak-albania-prej-vitesh-ne-shitje-iken-hotel-sheraton/
Marriott Internacional është një kompani multinacionale, e cila menaxhon dhe ofron në formë franchise një portofol të gjerë hotelesh. E themeluar nga Willard Marriott, kompania amerikane drejtohet tashmë nga djali i tij Bill Marriott. Ajo ka më shumë se 6000 hotele në 122 vende me mbi 1.2 milionë dhoma në total.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
