Sa herë i drejtohet një shtëpie, një rreze dielli hyn në atë shtëpi. Zemra e fëmijës rreh më shumë e mendja e tij hapet.
Për fëmijët e ngujuar, mësuese Liljana nuk është thjeshtë mësuesja e shkollës 9 vjeçare “Pashko Vasa”, në Shkodër.
Për ta, ajo është e gjithë bota përtej mureve dhe shpresa për një të nesërme më të mirë.
Mësuese Liliana u nderua me Certifikatë Mirënjohjeje në ndarjen e çmimeve të filantropisë nga Partnerët Shqipëri. Motivacioni ishte, “Për kontributin e çmuar dhe punën e vyer e të palodhur prej më shumë se pesëmbëdhjetë vitesh në edukimin dhe shkollimin e fëmijëve të ngujuar nga fenomeni i gjakmarrjes, që me përkushtimin dhe investimin e saj personal, u jep këtyre fëmijëve shpresë për të ardhmen”.
Në një zonë ku rrugëtimi është i vështirë edhë në këmbë, mësuese Liljana nuk mungon.
Vullnetarisht, ajo po mëson, e ushqen me shpresë, fëmijët e ngujuar dhe lehtëson dhimbjen e prindërve të tyre.
Në edukimin e fëmijëve ka arritur të angazhojë edhe mësuese të tjera, duke lënë një dritare hapur për fëmijët që po rriten brenda katër mureve.
Të intervistuar nga Partnerët, të rinjtë e prindërit e tyre shprehen mirënjohës.
“Liljana na ka ndihmue. Unë kam 6 fëmijë dhe jemi në hasmeri. Nuk kam dasht t’i çoj në shkollë. Ka ndërhy Liliana. Ajo i mëson, i pajis me çanta, pajisje dhe fëmijët tanë vazhdojnë shkollën përmes kontributit të saj. Kështu, mendoj se fëmijët janë shkolluar gati si shokët e tyre. Nuk u ka munguar gjë”, thotë nëna e disa fëmijëvë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
