Nga Fatima Gorezi – Nga një fshat i vogël në Drenicë, deri te auditorët prestigjiozë të Zvicrës dhe institucionet më të njohura ndërkombëtare, rruga e Prof. Dr. Fadil Çitakut është dëshmi e fuqisë që ka vizioni i bazuar në dije dhe përkushtim. Themelues i Academy of Leadership Sciences Switzerland dhe i Institutit për Avancim Kombëtar, ai ka ndërtuar një karrierë ku lidershipi shihet jo si retorikë, por si shkencë. Modelet e tij të validuara ndërkombëtarisht në neuroleadership, neuromarketing dhe neuroekonomi janë sot literaturë në universitete si Harvard, Stanford apo Yale, duke e bërë atë një prej mendjeve më inovative të diasporës shqiptare. Në këtë intervistë për Business Magazine, Prof. Çitaku flet për sfidat dhe mundësitë e diasporës, për rolin e shkencës në formimin e liderëve modernë dhe për mesazhin që u jep të rinjve shqiptarë: të ëndërrojnë dhe të ndërtojnë rrugën me integritet.
Pas kaq shumë vitesh eksperiencë në udhëheqje dhe edukim, si e vlerësoni zhvillimin e karrierës tuaj dhe cilat ishin momentet kyçe që formuan rrugën tuaj drejt krijimit të organizatave që drejtoni sot? Si u gjendët në Zvicër?
Rruga ime ka qenë e gjatë dhe e mbushur me sfida, por edhe me mundësi të jashtëzakonshme. U linda në fshatin Çitak të Drenicës dhe vitet e para i kalova në Kosovë. Për shkak të rrethanave të kohës, shumë shqiptarë kërkuan shkollim dhe jetë më të mirë jashtë vendit. Edhe unë, me dëshirën për të ndërtuar një karrierë akademike, u gjenda në Zvicër ku përfundova një pjesë dërrmuese të studimeve, deri në PhD.
Prej 25 vitesh ligjëroj në arsimin e lartë të Zvicrës, duke kontribuar në përgatitjen e gjeneratave të reja të profesionistëve dhe duke sjellë inovacion në mësimdhënie e kërkim shkencor. Ky angazhim afatgjatë më ka dhënë mundësinë të ndërthur përvojën akademike me vizionin për lidershipin shkencor.
Momenti që më hapi horizonte të reja ishte krijimi i Akademisë së Shkencave të Lidershipit në Cyrih (ALSS) në vitin 2014, një institut unik në llojin e vet, i fokusuar në fusha të reja shkencore si Neurobiznesi, Neuroekonomia, Neuroleadershipi dhe Neuromarketingu. Këtë akademi e kam iniciuar dhe themeluar vet, pas publikimit të modelit tim shkencor të parë për kompetencat e lidershipit në mjekësi dhe shëndetësi. Ky model – i bazuar 100% në shkencë doli në arenën ndërkombëtare si i pari në botë, duke u botuar në British Medical Journal (BMJ) dhe sot mbetet më i cituari në këtë fushë.
Sot, ALSS, të cilën e udhëheq bashkëpunon me mbi 100 profesorë eminentë nga e gjithë bota, duke e bërë ALSS një qendër ndërkombëtare të dijes dhe inovacionit në fushën e lidershipit modern.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
