Tregu bankar e ka nisur vitin me fitime, ndërsa kreditë me probleme iu rikthyen rritjes. Të dhënat e Bankës së Shqipërisë, tregojnë se në janar niveli i kredive me probleme u rrit lehtësisht në 13.5%, nga 13.2% që ishte në dhjetor.
Ekonomistët vlerësojnë se tendenca në rritje është rezultat i një klime ende të rënduar në pagesa, ku pavarësisht se kanë dalë nga skema debitorë problematikë, të tjerë janë futur në listën e pagesa të vonuara në më shumë se 90 ditë. Të dhënat tregojnë gjithsesi, se niveli është rreth pesë pikë përqindje më i ulët krahasuar me të njëjtën periudhë të një viti më parë.
Sipas ekonomistëve, ulja e qëndrueshme e kredive me probleme, do të mund të vijë përmes rritjes së kredisë me ritme të dukshme.
Megjithatë, kreditë me probleme nuk po prekin gjendjen financiare të bankave, të cilat patën rritje fitimesh në janar. Sipas BSH, kthimi nga kapitali ose fitimi në raport me kapitalin aksioner ishte 4.1%.
Vitin e kaluar, bankat tregtare shënuan një fitim rekord në vlerë absolute. Niveli i fitimit ishte gati 16%.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto