Ylli më i ndjekur në historinë e TikTok ka ndërmarrë një hap të fuqishëm në karrierë, i cili mund ta ketë siguruar financiarisht për gjithë jetën.
Dikur i perceptuar si një aplikacion argëtues dhe i thjeshtë, TikTok u shndërrua shpejt në një platformë ku talentet mund të ngrihen, të shfaqin aftësitë e tyre – qoftë në humor, edukim apo krijimtari – dhe të arrijnë miliona njerëz. Me këtë erdhën fama, paratë dhe kontrata sponsorizimi që krijuan yje brenda natës.
Nga TikTok kanë dalë emra të njohur ndërkombëtarisht si Charli D’Amelio, Bella Poarch, Addison Rae e shumë të tjerë. Disa prej tyre kanë kaluar në film, muzikë apo projekte të mëdha globale. Por askush nuk e ka shfrytëzuar këtë famë si Khaby Lame.
25-vjeçari me origjinë senegaleze, i rritur në Itali, ka mbi 160.4 milionë ndjekës në TikTok, duke u bërë fytyra më e njohur e videove pa fjalë, ku ironizon “life hacks” të panevojshme me mimikën e tij karakteristike. Edhe pse e hapi llogarinë në prill të vitit 2021, Khaby, ish-punëtor fabrike, u kthye me shpejtësi në një fenomen global, falë thjeshtësisë dhe humorit universal që nuk ka nevojë për përkthim.
Tani, fama e tij ka kaluar në një nivel krejt tjetër. Së fundmi, ai ka mbyllur një marrëveshje biznesi me vlerë 975 milionë dollarë, e lidhur drejtpërdrejt me industrinë e teknologjisë. Kompania Rich Sparkle Holdings ka blerë Step Distinctive Limited, një kompani e lidhur me Lame, duke hapur rrugën për rritje të mëtejshme të vlerës së tij neto.
Sipas mediave ndërkombëtare, marrëveshja përfshin krijimin e një versioni të Khaby-t të bazuar në inteligjencë artificiale. Ky “AI Digital Twin” do të përdorë identitetin e tij të fytyrës, zërin dhe sjelljen për të krijuar përmbajtje shumëgjuhëshe dhe transmetime virtuale live. Si pjesë e marrëveshjes, Khaby Lame do të jetë aksioner në partneritetin e ri, duke pasur fjalën kryesore në drejtimin dhe zhvillimin e tij. Në praktikë, kjo do të thotë se ai mund të ndërveprojë me fansat 24 orë në ditë, 7 ditë në javë, pa qenë fizikisht i pranishëm. Një karrierë globale, pa thënë asnjë fjalë.
Megjithatë, fama e tij nuk ka qenë pa polemika. Vitin e kaluar, Khaby Lame u ndalua përkohësisht në Shtetet e Bashkuara për shkelje të rregullave të emigracionit. Autoritetet amerikane konfirmuan se ai kishte tejkaluar afatin e vizës, ndërsa po përpiqej të largohej nga vendi më 6 qershor. Lame kishte mbërritur në SHBA më 30 prill për të marrë pjesë në Met Gala më 5 maj, në kuadër të bashkëpunimit të tij me markën Hugo Boss. Ai u lirua po atë ditë dhe u largua nga vendi pa pasoja të mëtejshme. Historia e tij mbetet një shembull i jashtëzakonshëm se si kreativiteti, thjeshtësia dhe teknologjia mund të ndërtojnë një perandori globale – edhe pa një fjalë të vetme.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
