CEO-ja i Nvidia-s, Jensen Huang, ka parashikuar një ndryshim të madh në fuqinë punëtore të botës korporative. Sipas tij, në të ardhmen inteligjenca artificiale (AI) do të punojë krah për krah me njerëzit, duke kaluar madje edhe nëpër procese zyrtare punësimi dhe trajnimi për t’u përshtatur me kulturën e kompanisë. Huang vlerëson se tregu potencial për këtë fuqi të re punëtore “agjentike” të AI-t mund të arrijë në vlera prej trilionë dollarësh.
Në një intervistë me Citadel Securities, Huang tha se e sheh të ardhmen e punës të përbërë nga infermierë, kontabilistë, juristë dhe marketierë digjitalë. “Nuk do të habitesha nëse disa do t’i licencojmë dhe disa do t’i punësojmë, në varësi të cilësisë dhe ekspertizës së thellë që kanë. Forca punëtore e së ardhmes do të jetë një kombinim i njerëzve dhe ‘njerëzve digjitalë’,” – theksoi ai.
Sipas Huang, integrimi i këtyre “punonjësve digjitalë” kërkon që ata të njohin dhe përvetësojnë kulturën, filozofinë dhe praktikat e kompanisë, njësoj si punonjësit njerëzorë. “I kam thënë CIO-s tonë se departamenti i IT-së do të jetë departamenti i Burimeve Njerëzore për agjentët e AI-t në të ardhmen,” – u shpreh ai. “Këta punonjës digjitalë do të punojnë bashkë me punonjësit tanë biologjikë, dhe kjo do të jetë forma e kompanisë sonë në të ardhmen.”
Lexo edhe: Meta vs OpenAI: Kush do ta sundojë epokën e AI-së?
Huang përmendi platforma si OpenAI, Harvey, OpenEvidence, Cursor, Replit dhe Lovable si burime të mundshme për këta agjentë AI, ndërsa të tjerë mund të zhvillohen brenda vetë kompanive. Ai zbuloi se Nvidia tashmë punëson më shumë agjentë të sigurisë kibernetike me bazë AI sesa staf njerëzor për të mbrojtur të dhënat dhe pronësinë intelektuale. CEO-ja i Salesforce, Marc Benioff, gjatë Forumit Ekonomik Botëror në Davos deklaroi se brezi aktual i drejtuesve do të jetë i fundit që udhëheq forca pune tërësisht njerëzore. “Nga ky moment e tutje… do të menaxhojmë jo vetëm punonjës njerëzorë, por edhe punonjës digjitalë,” – tha Benioff.
Ndërkohë, CEO-ja i Anthropic, Dario Amodei, parashikon që deri në vitet 2026-2027, sistemet e AI-t do të jenë “më të afta se pothuajse të gjithë njerëzit në pothuajse çdo fushë.” Ky vizion i përbashkët nga drejtuesit më të mëdhenj të teknologjisë përshkruan një epokë të re të bashkëjetesës midis njeriut dhe inteligjencës artificiale, ku HR, menaxhimi, dhe vetë mënyra si e konceptojmë punën po transformohen rrënjësisht.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto