Inteligjenca artificiale po ndryshon rrënjësisht mënyrën se si kompanitë kërkojnë punonjësit e rinj. Në vend që të fokusohen tek nivelet e arsimit, shumë kompani tani i japin përparësi aftësive praktike, eksperiencës dhe njohurive në fusha si shkenca e të dhënave dhe machine learning.
Sipas Lauren Winans, CEO e firmës së konsulencës HR Next Level Benefits, ky ndryshim u mundëson kompanive të zgjerojnë burimet e talenteve dhe të qëndrojnë në hap me role që evoluojnë më shpejt sesa mund t’i mbulojë arsimi tradicional.
Lexo gjithashtu: “Smells Like AI Spirit”: Një ditë që e sjell Inteligjencën Artificiale nga teoria në praktikë në Tiranë
Edhe gjigantë si Google dhe IBM kanë hequr kërkesat për diploma për disa role, duke preferuar aftësitë e punonjësve. Një sondazh i vitit 2025 nga ResumeTemplates zbuloi se një e katërta e punëdhënësve në SHBA planifikonin të hiqnin kërkesën për diplomë bachelor dhe të prioritizonin përvojën e rëndësishme.
Anthony Donnarumma, CEO i agjencisë 24 Seven, thotë se punësimi bazuar tek aftësitë është “një domosdoshmëri operative” për kompanitë që po implementojnë projekte me AI. Ai shton se kjo qasje përshpejton mbushjen e roleve, rrit produktivitetin dhe siguron që punonjësit të jenë “gati për punë” nga dita e parë.
Kompanitë gjithashtu përdorin AI për të përmirësuar procesin e punësimit. Kara Ayers nga Xplor Technologies tregon se sistemi SmartRecruiters i bazuar në AI ndihmon kompaninë të analizojë CV-të dhe profilet bazuar tek aftësitë, jo diplomat. Që nga adopimi i kësaj metode, kompania ka reduktuar varësinë nga agjencitë e punësimit, ka kursyer rreth 3 milionë dollarë dhe plotëson rolet në nën 30 ditë, krahasuar me mbi 60 ditë më parë.
Megjithatë, ekspertët paralajmërojnë se për të qenë efektive, kjo qasje kërkon një strukturë të qartë të roleve, të dhëna të sakta mbi performancën dhe sisteme HR që mund të integrojnë analizën e aftësive në procesin e punësimit. Gjithashtu, është thelbësore të menaxhohet në mënyrë objektive përdorimi i AI-së për të shmangur paragjykimet.
Në fund, aftësitë janë duke u bërë valuta më e vlefshme e punësimit në epokën e AI-së, duke hapur mundësi më të barabarta dhe duke krijuar rrugë të reja për avancim profesional për punonjësit e rinj.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
