Jaka: Sipërmarrjes i duhet një zë për të arritur modelet e suksesit

Kryetari i Dhomës së Tregtisë dhe Industrisë Tiranë, zoti Nikolin Jaka dhe përfaqësues të sipërmarrjes shqiptare pritën në5 tetor 2016 në një takim zotin Arlind Zeqiri, Ministër për Tërheqjen e Investimeve të Huaja në Maqedoni, zotin Faton Pollozhani,  zv/ministër i Transportit dhe Lidhjeve të këtij shteti dhe zotin Fatos Mustafa, drejtues i Zyrës Ndërkombëtare Invest Macedonia – Shqipëri & Kosovë.

Biseda mes palësh u fokusua në mundësitë potenciale që ekzistojnë për rritjen e bashkëpunimit ekonomik  (investimeve, shkëmbimeve tregtare, turizmit ndërmjet dy vendeve) në industri dhe sektorë të ndryshëm, shkëmbimin e eksperiencave, projekteve të përbashkëta si cross border etj., organizimin e aktiviteteve ekonomike midis dy vendeve dhe në rajon.

Për këtë të fundit ju mëshua fort idesë së “rajonit si një platformë ekonomike si e tërë”, me synim transformimin e rajonit në një treg të përbashkët për investime. Në fjalën e tij kreu i Dhomës së Tregtisë dhe Industrisë Tiranë, zoti Nikolin Jaka vlerësoi dhe falenderoi në mënyrë të veçantë qasjen pozitive të modelit Maqedonas si “një nga modelet, kapacitetet dhe platformat reale dhe konkrete më të suksesshme në rajonin tonë”.

Jaka theksoi se “sipërmarrja duhet të flasë në një zë të vetëm për të arritur modelet e suksesit përmes komunikimit dhe vendosjes së urave të bashkëpunimit”. Kjo për kreun e Dhomës arrihet duke ju lehtësuar sipërmarrësve të gjitha barrierat të cilat pengojnë në pasjen e tregu të përbashkët në rajon.

Në takim ishin dhe përfaqësues nga komuniteti i biznesit si, KASH, Shoqata e Prodhueseve Shqiptarë etj, të cilët shprehën interesin e tyre të drejtpërdrejtë për të rritur aktivitetin e tyre dhe për të gjetur mundësi të reja bashkëpunimi.

Në kushtet e një konkurrence gjithnjë e në rritje që vjen edhe nga globalizimi, këto takime shërbejnë për të koordinuar më mirë dhe më me efikasitet politikat ekonomike.

burimi: cci.al