Rritja e çmimeve nuk ka të ndalur edhe për muajin maj. Inflacioni arriti në 6.7%, ndërsa ky nivel është më i larti në 20 vitet e fundit në vendin tonë. Grupet kryesore që ndikuan në inflacionin e muajit maj janë ushqimet ndjekur nga transporti, ku përfshihen çmimet e rritura të karburanteve, dhe më pas vjen grupi i qirasë, lëndëve djegëse dhe energjisë.
Kostot e energjisë janë rritur për bizneset në treg të lirë, ndërsa në muajin maj çmimi arriti 32 lekë kW/h, 3 herë më i lartë se një vit më parë, ndërsa me 60% është rritur edhe çmimi i energjisë për bizneset në tension të mesëm, por mbetet i pandryshuar për familjarët dhe bizneset e vogla.
Karburantet gjithashtu vijojnë rritjen, ndërsa vendimi i fundit i Bordit e ka dërguar çmimin e naftës në nivelin historik në 258 lekë.
Banka e Shqipërisë ka rritur normën bazë të interesit për të luftuar inflacionin, por kjo masë ende nuk po jep shenja në ngadalësim, ndërsa niveli i kredisë së re apo paraja në qarkullim vijon të rritet.
Nga krahu tjetër, leku po vazhdon të qëndrojë i fortë në krahasim me euron. Kjo ka zbehur disi inflacionin që vjen nga mallrat e blerë nga jashtë, pasi me BE-në, Shqipëria realizon rreth 60% të tregtisë së jashtme.
Inflacioni i lartë po jep dhe shenjat e para në ngadalësimin e konsumit në vend, siç shihet edhe nga shifrat e doganave, ku në muajt prill dhe maj janë importuar sasi më të pakta nafte.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
