Google po zhvillon një veçori të re për aplikacionin e tij Gemini, e quajtur “Projects”, e cila do të funksionojë në mënyrë të ngjashme me mjetin Projects të OpenAI, i prezantuar në fund të vitit 2024. Ky funksion do t’u lejojë përdoruesve të krijojnë hapësira të ndara për tema specifike brenda aplikacionit, duke mundësuar biseda të lidhura me një temë të vetme brenda një workspace të organizuar. Aktualisht, veçoria është ende në zhvillim dhe pritet të publikohet së shpejti për përdoruesit.
Sipas raportit të Android Authority, Google ka punuar prej kohësh në këtë veçori dhe versioni beta i fundit i aplikacionit, 16.48.54.sa.arm64, zbulon ndërfaqen dhe disa nga kapacitetet e funksionit të ”Projects”. Megjithatë, funksioni ende nuk është aktiv për përdoruesit, përfshirë ata të beta-versionit.
Si funksionon “Projects” në Gemini
Përdoruesit që do të kenë akses do të mund të zgjedhin një emër për projektin e tyre dhe të shtojnë burime dhe një fushë fokusimi, e cila shërben si udhëzim për mënyrën se si Gemini duhet të operojë brenda projektit. Përveç kësaj, përdoruesit mund të ngarkojnë dokumente për të ndërtuar kontekstin e temës, edhe pse ekziston një kufizim, maksimumi 10 dokumente për projekt.
Veçoria ofron gjithashtu mundësinë për të parë projektet në panelin anësor dhe për të fiksuar ato që përdoren më shpesh, duke e bërë më të lehtë menaxhimin e shumë bisedave të lidhura me një temë të caktuar.
Megjithatë, duhet theksuar se këto informacione bazohen në një analizë të APK-së dhe Google ende nuk e ka shpallur zyrtarisht këtë veçori, ndaj përdoruesit duhet të marrin këto lajme me rezervë derisa të publikohet zyrtarisht.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
