Sezoni i vlerësimit të performancës në punë shpesh shoqërohet me stres dhe pasiguri për shumë punonjës. Sipas coaches së karrierës, Sarah Baker Andrus, mënyra se si silleni gjatë këtij takimi mund të përcaktojë marrëdhënien tuaj me menaxherin për një kohë të gjatë.
Ekspertja thekson se menaxhimi i emocioneve është thelbësor: të qëndroni të qetë, të përfshirë dhe të hapur ndaj feedback-ut lë një përshtypje pozitive, ndërsa reagimet mbrojtëse apo nervozizmi mund të kenë efekt të kundërt.
1. Të shkoni të papërgatitur
Një nga gabimet më të mëdha që bëjnë punonjësit është mungesa e përgatitjes. Andrus këshillon që para vlerësimit, çdo punonjës të analizojë me kujdes sukseset dhe fushat ku mund të përmirësohet.
Shpesh, punonjësit kopjojnë vetëvlerësimin e vitit të kaluar pa reflektuar realisht mbi performancën aktuale. Kjo, sipas saj, dërgon sinjalin se nuk ka angazhim për zhvillim profesional. Vetëvlerësimi duhet parë si një dokument serioz, që do të përdoret edhe nga të tjerë në vendimmarrje.
2. Reagimi negativ ndaj kritikave
Marrja e kritikave nuk është e lehtë, por reagimi i menjëhershëm dhe argumentues konsiderohet një “alarm i kuq”. Ekspertja sugjeron që punonjësit të marrin kohë për të reflektuar, të marrin frymë thellë dhe të mos përgjigjen me impuls.
Nëse nuk jeni dakord me një vlerësim, është më e mençur të kërkoni vazhdimin e diskutimit në një moment tjetër, në vend që të krijoni tension gjatë takimit.
3. Dalja nga tema
Një tjetër gabim i zakonshëm është përdorimi i vlerësimit të performancës për të hapur tema që kërkojnë takime të veçanta, si konflikte me kolegë apo çështje orari.
Sipas Andrus, vlerësimi i performancës duhet të fokusohet në objektivat profesionale, arritjet dhe planet për të ardhmen. Problemet e tjera duhet të trajtohen në kohën e duhur, jo në këtë takim të kufizuar në kohë.
Ekspertja përfundon se një qasje e qetë, e përgatitur dhe profesionale ndaj vlerësimit të performancës jo vetëm që rrit shanset për sukses, por edhe forcon marrëdhënien me drejtuesit dhe hap rrugë për zhvillim të mëtejshëm në karrierë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
