Edicioni i tretë i Future2Tech mbylli dyert më 3 tetor, duke konfirmuar edhe një herë rolin e tij si ngjarja më e madhe e teknologjisë, inovacionit dhe edukimit në Shqipëri. Për dy ditë me radhë, Pallati i Kongreseve u kthye në epiqendrën e ideve, risive dhe vizioneve që po formësojnë të ardhmen digjitale të vendit.
Me 120 ekspozues, 5,000+ vizitorë, 13 panele diskutimi dhe mbi 70 folës kombëtarë e ndërkombëtarë, ky edicion e tejkaloi çdo pritshmëri, duke e konsoliduar Future2Tech si një platformë unike ku ndërthuren biznesi, startup-et, akademia dhe politikat publike.
Ceremonia zyrtare e hapjes u përshëndet nga një sërë personalitetesh që theksuan rëndësinë e teknologjisë dhe inovacionit për zhvillimin e Shqipërisë. Fjalën hyrëse e mbajtën Anuela Ristani, përfaqësuese e Bashkisë së Tiranës dhe kryetare e komanduar, Eduard Shalsi, Kryetar i Komisionit për Ekonominë dhe Financat, Balázs Révész, CEO i Vodafone Albania, dhe Niklas Ström, Ambasador i Suedisë në Shqipëri. Gjithashtu edhe ministrja e Ekonomise dhe Inovacionit, Delina Ibrahimaj mbajti nje fjale pershendetese ku theksoi rëndësinë e bashkëpunimit ndërmjet sektorit publik dhe privat, rolin e rinisë në zhvillimin teknologjik dhe nevojën për ta kthyer Shqipërinë në një qendër të inovacionit rajonal.
Një momentum historik për Shqipërinë digjitale
Në një periudhë kur Shqipëria po tërheq vëmendjen botërore, nga emërimi i Ministres së parë të AI-së, deri te zhvillimet e reja në startup-e dhe teknologji, Future2Tech 2025 u shndërrua në simbolin e këtij momentumi. Ngjarja tregoi se vendi po hyn me hapa të sigurt në epokën e inovacionit, duke lidhur brezat, idetë dhe institucionet në një ekosistem të gjallë bashkëpunimi.
Pikat kulmore të eventit
Edicioni u hap me ceremoninë zyrtare të mirëseardhjes nga Enejda Sheku dhe Gert Boshnjaku, ndërsa përfaqësues qeveritarë, ambasadorë dhe drejtues kompanish dhanë mesazhe frymëzuese për të ardhmen digjitale të vendit.
Pas hapjes, seria e forumeve dhe paneleve solli diskutime të thelluara mbi temat më aktuale:
Innovation for the Future – Leaders Transforming Today, ku u trajtuan sfidat e inteligjencës artificiale, sigurisë kibernetike dhe edukimit teknologjik.
E ardhmja e edukimit, që vuri në qendër mënyrën se si sistemi arsimor mund të përgatitë të rinjtë për profesionet e së ardhmes.
Forumi i Qëndrueshmërisë, organizuar nga Albanian ESG Network, i cili bashkoi kompani si Titanium, Deloitte dhe Coca-Cola, për të diskutuar praktikat e qëndrueshme të biznesit në Shqipëri.
Fintech Forum nga EasyPay, me fokus në integrimin e Shqipërisë në sistemin SEPA dhe zhvillimin e Open Banking, një hap i madh për transformimin e tregut financiar vendas.
AI Forum nga AmCham Albania, që analizoi përdorimin e inteligjencës artificiale në ekonomi dhe shoqëri.
Future of Marketing, nën moderimin e Rafaela Rica, që eksploroi ndikimin e teknologjisë në industrinë e marketingut.
Gjithashtu, Cybersecurity Forum i organizuar nga InfoSoft Systems, ERP Workshop nga InfoSoft Business Solutions dhe Gaming Forum nga Albanian Gaming Community sollën energji të re dhe ide frymëzuese për profesionistët e fushës.
Startup-et në qendër të vëmendjes
Një pjesë thelbësore e Future2Tech mbeti mbështetja për startup-et shqiptare. Përmes workshop-eve, pitch-eve dhe mentoring sessions, dhjetëra të rinj patën mundësinë të prezantojnë idetë e tyre para investitorëve dhe ekspertëve të industrisë.
Në këtë kuadër, Gaming Zone, e zhvilluar me mbështetjen e Istituto Italiano di Cultura, solli një ndërthurje unike të kulturës, edukimit dhe argëtimit, duke u bërë një nga atraksionet më të vizituara të panairit.
Çmimi “Tan Mezini”, një nderim për vizionin dhe inovacionin shqiptar
Tradita e bukur e ndarjes së çmimit “Tan Mezini” vazhdoi edhe këtë vit, duke nderuar frymën e sipërmarrjes dhe inovacionit që karakterizonte pionierin e teknologjisë shqiptare. Çmimi iu dha startup-it Eco Charger për qasjen e tij inovative në zgjidhje të gjelbra dhe efikase për energjinë.
Bashkë me ta, u vlerësuan edhe idetë frymëzuese të Katalogim Doll App, Digital Roots and Lookup Parking, të cilët dëshmuan se kreativiteti dhe pasioni për inovacionin po rriten çdo vit më shumë në Shqipëri.
Një fund që shënon fillimin e një epoke të re
Future2Tech 2025 nuk ishte vetëm një panair, ishte një deklaratë. Një dëshmi se Shqipëria po kalon nga konsumimi i teknologjisë, në krijimin e saj. Me një ekosistem gjithnjë e më të bashkuar dhe një brez të ri inovatorësh të vendosur të ndryshojnë botën, edicioni i tretë mbyllet me bindjen se e ardhmja e teknologjisë shqiptare sapo ka filluar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
