Nëse për brezat e mëparshëm telefonatat ishin pjesë e përditshmërisë, për të rinjtë e sotëm ato janë kthyer në burim stresi dhe ankthi. Ky fenomen quhet “telefobi” dhe po përhapet me shpejtësi, veçanërisht tek gjenerata Z, brezi i rritur plotësisht në epokën digjitale.
Sipas një studimi britanik, 56% e të rinjve stresohen nga një telefonatë, duke e lidhur automatikisht me lajme negative apo situata të pakëndshme. Ndërkohë, 23% shmangin t’i përgjigjen telefonit edhe kur thirrja është e rëndësishme, përfshirë kontaktet nga punëdhënësit apo intervistat për punë.
Frika rritet edhe më shumë kur bëhet fjalë për numra të panjohur. 68% e të rinjve refuzojnë telefonatat nga numra që nuk i njohin, shpesh nga frika e mashtrimeve apo thirrjeve të krijuara nga inteligjenca artificiale.
Sipas psikologes Dr. Charlotte Armitage, telefobia lidhet drejtpërdrejt me ankthin social. Ndryshe nga brezat e mëparshëm, të rinjtë sot preferojnë komunikimin me mesazhe, duke shmangur kontaktin verbal që kërkon reagim të menjëhershëm.
Fenomeni është bërë aq serioz, sa disa institucione arsimore në Britani kanë nisur trajnime speciale për komunikimin telefonik, për të ndihmuar të rinjtë të fitojnë vetëbesim dhe aftësi profesionale.
Ekspertët paralajmërojnë se, edhe në epokën e teknologjisë, aftësia për të komunikuar drejtpërdrejt mbetet thelbësore për suksesin në karrierë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
