Fotot e Vitit 2025

Nga mijëra imazhe të realizuara nga fotografët e National Geographic në mbarë botën, kemi përzgjedhur ato që na emocionuan dhe na frymëzuan më shumë.

NDËRTIMI I NJË MEGAQYTETI TË PËRKOHSHËM

Prayagraj, Uttar Pradesh, Indi

Çdo 144 vjet, India mirëpret tubimin më të madh njerëzor në botë: Mahakumbh Mela, një festival fetar që zhvillohet në bashkimin e shenjtë të lumenjve Ganga, Yamuna dhe lumit mitik Saraswati.

Fotografi George Steinmetz mori pjesë në edicionin e vitit 2025, së bashku me mbi 400 milionë pelegrinë hindu, të vendosur në një metropol të përkohshëm të ndërtuar posaçërisht për këtë rast. Përmes fotografive të tij, ai synoi të kapte ndjesinë e të qenit “një molekulë në këtë masë njerëzore në lëvizje”.

Fotografi nga George Steinmetz

URDHRAT E MBRETIT

Luena, Angola

Në malësitë e mbuluara nga mjegulla të Angolës, hyrja në një nga ekosistemet më pak të studiuara të Afrikës jugore kontrollohet nga Mbreti Mwene Chivueka VI, udhëheqësi i popullit Luchazi. Për breza me radhë, komuniteti i tij ka nderuar një tufë elefantësh të rrallë, vendas të zonës — të cilët shkencëtarët nga jashtë kanë filluar t’i studiojnë vetëm kohët e fundit, me lejen e mbretit.

Fotografi nga Jasper Doest

GJUMI I BLETËS

Davis, Kaliforni

Një bletë “sunflower chimney” pushon mbi një jastëk ngjyrash okër në mbrëmje, me shumë gjasë tashmë në gjumë pas një dite të gjatë pllenimi. Kjo specie shpesh folezon në bazën e lulediellit dhe lëviz bashkë me fermerët, teksa ata rrotullojnë kulturat bujqësore.

Fotografi nga Karine Aigner

RILINDJA E LUMIT

Bagdad, Irak

Në brigjet e lumit Tigër, gra të besimit mandean mbajnë kurora ceremoniale prej myrte, si pjesë e ritualit kryesor të kësaj feje: pagëzimi në lumë. Mandeanizmi, një nga besimet gnostike më të vjetra në botë, e nderon Gjon Pagëzorin si profetin më të madh. Që nga pushtimi amerikan i Irakut në vitin 2003, ndjekësit e këtij besimi janë përballur me përndjekje dhe zhvendosje masive, duke rrezikuar seriozisht këto rite të lashta.

Fotografi nga Moises Saman

Lexo edhe:20 artistët më të paguar të vitit 2025

NJË SUP PËR T’U MBËSHTETUR

Maceió, Alagoas, Brazil

Lagje të tëra në qytetin bregdetar të Maceió-s po fundosen për shkak të dekadave të nxjerrjes së kripës nga shkëmbinjtë. Shkatërrimi ka zhvendosur dhjetëra mijëra banorë, përfshirë Damião Carlos da Silva, i cili humbi shtëpinë dhe u vendos në strehim të përkohshëm. Ngushëllimin e gjen në momentet e vogla të jetës, si ky çast i ndarë me zogun e tij të vogël.

Fotografi nga Maíra Erlich

GJASHTË MILIONË NË LËVIZJE

Sudani i Jugut

Një studim ajror i shumëpritur mbi jetën e egër në Sudanin e Jugut zbuloi diçka të jashtëzakonshme: rreth gjashtë milionë antilopa u dokumentuan duke përshkuar fushat lindore të vendit, duke ndryshuar kuptimin tonë mbi migrimet e kafshëve në këtë rajon. Fotografi Marcus Westberg përdori dron për të regjistruar këtë fenomen — migrimin më të madh tokësor në planet — duke e quajtur atë “një simbol shprese” për një vend të goditur nga vite trazirash.

Fotografi nga Marcus Westberg

GRABITQARI I PAKAPSHËM

Parku Shtetëror Rio Doce, Minas Gerais, Brazil

Teksa monitoronte strofullën e një armadilloje gjigante të rrallë në Pyllin Atlantik të Brazilit, fotografi Fernando Faciole u përball ballë për ballë me një tjetër specie të rrezikuar: jaguarin. Shpyllëzimi i rëndë ka shkatërruar popullatën e tyre dhe sot besohet se më pak se një duzinë jaguarësh kanë mbetur në këtë park.

Fotografi nga Fernando Faciole

DHIMBJA E NJË VAJZE

Tocoa, Colón, Honduras

Julia López, nëntë vjeçe, viziton varrin e të atit, Juan, i cili u vra me armë zjarri para syve të saj në shtator 2024. Ai ishte një kundërshtar i hapur i një projekti minerar të ndërtuar në një park kombëtar. Juan López ishte një nga 18 aktivistët mjedisorë të vrarë në Honduras vitin e kaluar — një nga vendet më të rrezikshme në botë për këtë lloj aktivizmi.

Fotografi nga Brent Stirton

DARKË MBI AKULL

Oqeani Arktik, në veri të Svalbardit, Norvegji

Një balenë, e ngordhur dhe në dekompozim, noton mes copëzave të akullit polar. Kur fotografi Roie Galitz e kapi këtë skenë me dron, pamja ishte aq tronditëse sa fillimisht nuk u vu re arusha polare femër, e cila përpiqej të çante lëkurën e trashë të balenës për t’u ushqyer.

Ngjarja ngriti një pyetje intriguese: çfarë bënte një balenë spermë kaq në veri? Sipas Galitz, ngrohja e ujërave arktike po i shtyn disa specie përtej habitateve të tyre tradicionale. Shkaku i vdekjes mbetet i panjohur.

“Është gjithçka shumë e brishtë dhe e paparashikueshme,” thotë ai. “Ajo që sheh sot, nesër mund të mos ekzistojë më.”

Fotografi nga Roie Galitz

NË KRAHËT E FAMILJES

Rajoni Poltava, Ukrainë

Ndërsa konflikti Rusi–Ukrainë vazhdon, jeta mbetet e pasigurt. Teksa i ati lufton në front, Tymofii Tsvetkov u detyrua të largohej nga qyteti i tij dhe gjeti strehë tek të afërmit në Ukrainën qendrore. I qetësuar nga tezja e tij, vogëlushi mban një bluzë me një mesazh tronditës: “Babai im shërben në forcat e armatosura të Ukrainës.”

Fotografi nga Anastasia Taylor-Lind

PULA APO VEZA?

Berkeley, Kaliforni

Prej vitesh, fotografi Anand Varma ka tentuar të dokumentojë momentin kur embrioni i zogut bëhet i dallueshëm, por veza ende ruan formën e saj. Pas eksperimenteve të shumta, ai arriti ta kapë këtë fazë në ditën e 12-të të zhvillimit. Disa prej zogjve të rritur më pas u dhuruan familjeve në komunitet.

Fotografi nga Anand Varma

DUKE KALËRUAR LART

Quebrada de Humahuaca, Argjentinë

Diego Paredes, duke qëndruar në shalën e kalit të tij Lobuno, vështron një rrugë tregtare dikur të gjallë në këtë luginë piktoreske të Argjentinës veriore. Së bashku me vëllain e tij, ai udhëheq ture edukative me kalë përmes kompanisë së tyre “Renaciendo Costumbres”, duke ringjallur traditat dhe jetën rurale të zonës.

Fotografi nga Natalia Favre

NG