Plug and Play Tirana ka hapur zyrtarisht aplikimet për kohortën e dytë të programit të akselerimit, duke ftuar startup-et më premtuese nga Shqipëria dhe rajoni të bëhen pjesë e një prej programeve më me ndikim në botën e inovacionit. Njëzet startup-e do të përzgjidhen për t’ju bashkuar programit që nis në shkurt 2026, ndërsa afati për aplikime është 20 dhjetor 2025.
Kjo edicion do të shtrihet përgjatë tetë bootcamp-eve intensive, të krijuara për t’u ofruar ekipeve një eksperiencë të thelluar zhvillimi dhe shkallëzimi ndërkombëtar. Gjatë këtyre javëve, startup-et do të punojnë ngushtësisht me mentorë dhe ekspertë nga qendra të ndryshme globale të teknologjisë, duke marrë udhëzime strategjike në fusha kyçe si zhvillimi i produktit, rritja, qëndrueshmëria, ndërtimi i partneriteteve dhe përgatitja për investim. Në secilin prej bootcamp-eve do të marrin pjesë edhe investitorë ndërkombëtarë, të cilët do të ndjekin progresin e ekipeve dhe do të identifikojnë mundësi të reja bashkëpunimi dhe investimi.
Startup-et pjesëmarrëse do të kenë akses në platformat e dedikuara të Plug and Play, ku do të lidhen drejtpërdrejt me korporata globale dhe partnerë të ekosistemit. Përveç një rrjeti të gjerë ndërkombëtar, ato do të përfitojnë një kalendar të pasur ngjarjesh networking-u dhe mundësish bashkëpunimi që zakonisht rezervohen për programet më elitare të akselerimit. Gjatë gjithë periudhës, ekipet do të jenë gjithashtu të ekspozuara ndaj mundësive për investime të drejtpërdrejta nga Plug and Play — një prej aktorëve më aktivë në skenën globale të venture capital.
Programi do të kulmojë me Plug and Play Tirana Expo, ku startup-et do të prezantojnë arritjet e tyre përpara investitorëve, institucioneve, korporatave dhe partnerëve ndërkombëtarë. Pas kësaj faze, dhjetë startup-et më të mira do të përzgjidhen për një program gjashtëjavor në Plug and Play Headquarters në Silicon Valley, ku do të marrin pjesë edhe në Plug and Play Silicon Valley Summit – një nga ngjarjet më të rëndësishme globale për startup-et që synojnë të hyjnë në tregjet ndërkombëtare.
Rezultatet e kohortës së parë dëshmojnë potencialin transformues të programit për ekosistemin e inovacionit në Shqipëri. Dhjetë startup-et më të mira të edicionit inaugural sapo janë kthyer nga programi gjashtëjavor në Silicon Valley, ku patën mundësinë të prezantohen para dhjetëra investitorëve dhe partnerëve globalë. Pikërisht gjatë këtij programi u realizuan edhe investimet e para nga Silicon Valley në Shqipëri përmes Plug and Play.
Startup-et e interesuara mund të aplikojnë deri më 20 dhjetor 2025 për t’u bërë pjesë e një prej programeve më transformuese për sipërmarrjen dhe teknologjinë në rajon. Programi nis zyrtarisht në shkurt 2026 dhe pritet të sjellë një tjetër valë inovacioni që do ta lidhë Tiranën me rrjetin global të Plug and Play.
Plug and Play është një nga platformat akseleruese më të fuqishme në nivel global. Me qendrën kryesore në Silicon Valley dhe zyra të shpërndara në mbi 50 qytete në SHBA, Evropë dhe Azi, ky ekosistem ka ndihmuar dhjetëra startup-e të shndërrohen në “unicorns”, duke bashkëpunuar njëkohësisht me më shumë se 500 korporata ndërkombëtare për të forcuar lidhjet midis inovatorëve dhe industrisë. Së fundmi, edhe Tirana i është bashkuar këtij rrjeti prestigjioz, duke e vendosur Shqipërinë në skenën globale të teknologjisë dhe inovacionit.
Ky program mundësohet falë bashkëpunimit të fortë ndërinstitucional që synon ndërtimin e një ekosistemi të qëndrueshëm inovacioni në Shqipëri. Plug and Play Tirana mbështetet nga Fondacioni Shqiptaro-Amerikan për Zhvillim (AADF), në bashkëpunim me IN Groupe, Piramida Tiranë, Bashkia e Tiranës dhe Innovation Hub.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
