Një raport i ri i OECD-së tregon një kontrast të thellë mes Europës dhe vendeve të “Global South”, ku brezi i ri po e përqafon inteligjencën artificiale me shumë më tepër shpejtësi. Ndërsa teknologjitë gjenerative premtojnë transformim në ekonomi, shëndetësi dhe tregun e punës, Europa rrezikon të mbetet pas në një garë globale ku ritmi është vendimtar.
Sipas sondazhit të realizuar në bashkëpunim me kompaninë Cisco, të rinjtë e moshës 18–35 vjeç në Indi, Brazil dhe Afrikën e Jugut janë sot përdoruesit më aktivë të AI-së gjenerative, duke lënë pas vende të mëdha europiane si Gjermania, Franca dhe Italia.
Sondazhi përfshiu mbi 14,000 njerëz në 14 vende, duke analizuar përdorimin e AI-së dhe zakonet digjitale të qytetarëve.
India në krye, Gjermania në fund të Eurosferës së AI
Hendeku është i thellë: në Indi, 66% e të anketuarve thonë se përdorin rregullisht AI gjenerative, ndërsa në Gjermani vetëm 19%. Përtej shifrave të ulëta të përdorimit, europianët shfaqen skeptikë ndaj ndikimit të AI-së në jetën profesionale dhe të përditshme.
Në kontinent, Holanda kryeson me 25% përdorim të rregullt, ndërsa Gjermania regjistron nivelin më të ulët, me 19%. Pavarësisht kësaj, gjermanët, francezët dhe italianët pranojnë se AI është “të paktën disi e dobishme”, ndërsa holandezët mbeten më të rezervuar.
Megjithatë, të gjitha këto shifra qëndrojnë nën mesataren globale, ku 80% e të rinjve nën 35 vjeç e konsiderojnë AI-në të dobishme.
Optimizëm në ekonomitë në zhvillim, skepticizëm në Europë
Raporti nënvizon se të rinjtë në vendet e zhvilluara shfaqin skepticizëm, ndërsa moshat e reja në ekonomitë në zhvillim janë dukshëm më optimiste. Europa dhe Japonia shfaqin nivele të ulëta pritshmërish ndaj potencialit transformues të teknologjisë.
Kjo reflektohet qartë edhe në perceptimin e ndikimit në karrierë: pothuajse një e treta e holandezëve besojnë se AI nuk do të ketë asnjë efekt në punën e tyre, ndërsa në Gjermani, Francë dhe Itali vetëm pak mbi 20% mendojnë njësoj.
Raporti sugjeron se europianët “janë ose të pa bindur, ose të pasigurt” rreth mënyrës se si AI do të ndikojë tregun e punës.
Trajnimi, pika më e dobët e Europës
Një tjetër hendek i dukshëm ka të bëjë me edukimin digjital:
Mbi 70% e të anketuarve në Francë dhe Gjermani thonë se nuk kanë marrë asnjë trajnim për AI.
Në Spanjë dhe Itali, shifrat janë pak më të ulëta, 68% dhe 64%, përkatësisht.
Megjithatë, disa tregje po përpiqen të kapin ritmin. Gati 30% e italianëve thonë se planifikojnë të marrin trajnim për AI brenda vitit të ardhshëm, ndërsa hendeku i interesit është më i theksuar në Gjermani dhe Francë, ku shumica nuk shprehin gatishmëri për t’u trajnuar.
Për krahasim, mbi 60% e të rinjve në Indi, Brazil dhe Afrikën e Jugut planifikojnë trajnim në AI gjatë vitit të ardhshëm.
Pavarësisht ritmeve të larta të adoptimit, OECD paralajmëron se të rinjtë dhe vendet në zhvillim janë gjithashtu më të ekspozuar ndaj efekteve anësore: lodhje nga ekranet, varësi nga teknologjia dhe zhvendosje drejt socializimit tërësisht digjital.
Në një moment kur AI po riformëson ekonominë, vendet që nuk ndërtojnë infrastrukturën e duhur dhe sidomos ato që nuk përgatisin fuqinë punëtore rrezikojnë të humbasin mundësi të rëndësishme zhvillimi.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
