Sulmet iraniane ndaj Dubait dhe mbyllja e aeroportit të tij kanë shkaktuar një eksod të shpejtë të elitës ekonomike globale, që po kërkon rrugë alternative larg Emirateve përmes avionëve privatë.
Qyteti i njohur për luksin; strehë miliarderësh, influencerësh dhe miliona turistësh është në tension pasi dronë dhe raketa, të lëshuara si kundërpërgjigje ndaj sulmeve amerikano-izraelite kundër Iranit, dëmtuan aeroportin dhe goditën hotele e pika simbolike.
Ministria e Mbrojtjes e Emirateve të Bashkuara Arabe tha se kishte vijuar të identifikonte në hapësirën e saj ajrore raketa dhe dronë, ndërsa vendi njoftoi mbylljen e ambasadës në Teheran.
Shumë persona janë nisur me makinë drejt Omanit, rreth katër orë e gjysmë larg ku aeroporti i Muskatit vijon të operojë, megjithëse me vonesa.
Fluturimet komerciale nga Muskati drejt Europës janë pothuajse të gjitha të rezervuara deri në fund të javës. Një turiste ruse, Alexandra Vavilova, tha se kishte arritur të siguronte një nga biletat e fundit: një fluturim nga Muskati drejt Kolombos, Sri Lanka.
Të tjerë kanë zgjedhur një udhëtim 10-orësh drejt Riadit, në Arabinë Saudite, ku aeroporti mbetet funksional.
90 mijë euro për një fluturim
Ndërkohë, çmimet e avionëve privatë janë trefishuar. JetVip, një broker me bazë në Muskat, tha se një fluturim me një avion të vogël tip Nextant drejt Stambollit tashmë kushton rreth 85 mijë euro, rreth tre herë më shumë se normalisht. Vendet në charter privat drejt Moskës po shiten me rreth 20 mijë euro për person.
Kompania austriake AlbaJet konfirmoi se disponueshmëria është “jashtëzakonisht e kufizuar”, me fluturime drejt Europës që arrijnë në 90 mijë euro. Shumë operatorë refuzojnë të fluturojnë për shkak të kërkesave të sigurimit dhe rrezikut në rajon. Sipas raportimeve, fluturimet private nga Riadi drejt Europës kanë arritur deri në 350 mijë dollarë.
Stuhi politike në Itali
Kriza ka ndezur polemika në Itali pasi ministri i Mbrojtjes Guido Crosetto u kthye në Romë me një avion qeveritar, ndërkohë që qindra italianë mbetën të bllokuar në Dubai.
Ai u akuzua se ndodhej me pushime kur shpërtheu lufta SHBA-Izrael kundër Iranit. Për të zbutur reagimet, u kthye vetëm, duke lënë familjen në Dubai, dhe deklaroi se kishte paguar vetë për fluturimin.
Turistët të bllokuar në hotele dhe kroçera
Për shumicën e turistëve, alternativa e vetme është të presin. Ka pasur konfuzion mbi operacionet në aeroportet e Dubait dhe Abu Dhabit. Kompani si Emirates, flydubai dhe Etihad Airways njoftuan rifillim të kufizuar fluturimesh, kryesisht për riatdhesim.
Bordi i turizmit në Dubai ka udhëzuar hotelet të mos dëbojnë turistët që nuk mund të largohen për shkak të anulimeve masive, duke u zgjatur qëndrimin me të njëjtat kushte rezervimi. Megjithatë, disa turistë rusë kanë raportuar online se u është kërkuar të paguajnë shtesë ose të largohen. Në det, mijëra turistë perëndimorë mbeten të bllokuar në anije kroçerash përgjatë Gjirit. Të paktën gjashtë anije të mëdha janë ankoruar pranë porteve, me pasagjerë të kufizuar në kabina.
Pasagjerë në kroçerën Mein Schiff 4 panë re të zeza tymi mbi portin Zayed në Abu Dhabi pas shpërthimeve të shkaktuara nga dronët iranianë. Ndërsa në MSC Euribia, kartat e dhomave janë zgjatur deri më 6 mars, duke sinjalizuar se largimi nuk pritet së shpejti.
Dubai, simbol i stabilitetit dhe luksit në Gjirin Persik, është kthyer brenda pak ditësh në një qytet në pritje, mes avionëve privatë që fluturojnë për ata që munden dhe mijëra turistëve që presin qartësi.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
