Era e djegies ndihet ende nga larg. Tym i dendur, kapanone të nxira dhe policë që nuk lejojnë askënd të afrohet. Kështu e gjeti këtë mëngjes BusinessMag ish-tregun e Uzinës së Dinamos në rrugën “5 Maji”, aty ku mbrëmjen e djeshme një zjarr i fuqishëm shkrumboi magazinat e qindra bizneseve duke shkatuar dëme kolosale.
Edhe pse flakët janë vënë nën kontroll nga zjarrfikësit, vatra aktive vijojnë ende brenda kapanoneve, duke e bërë zonën të rrezikshme. Për këtë arsye, autoritetet nuk lejojnë asnjë nga tregtarët t’u afrohet hapësirave ku kishin të magazinuar mallrat e tyre.
Brenda këtyre kapanoneve, sipas burimeve nga tregtarët, zhvillonin aktivitetin e tyre tregtar rreth 200 biznese, kryesisht të fushës së veshmbathjes dhe elektroshtëpiakeve; mallra që sot janë kthyer në hi.
“Më iku gjithë jeta brenda natës”
Pranë shiritit të policisë, tregtarë të dërrmuar presin pa ditur asgjë. Disa qajnë në heshtje, të tjerë flasin me zë të lartë, të dëshpëruar, por edhe të zemëruar për ndërhyrjen e vonuar dhe të cunguar të zjarrëfikësve që në momentet e para.
“Ka ardhur vetëm një zjarrfikëse, i mbaroi uji. Mund të ndalohej zjarri, nuk do hapej deri këtu. S’më lanë të futesha brenda, se e fikja vetë. Sa e kisha sjellë mallin nga Kina… mbi 500 mijë euro dëm. Këto gjëra na detyrojnë të ikim. Do iki nga Shqipëria, s’kam çfarë të bëj më këtu”, – thotë për BusinessMag R…, një nga tregtarët, ndërsa sytë i mbushen me lot.
Pamjet janë tronditëse: burra e gra që mbajnë kokën me duar, qytetarë që afrohen për të shprehur solidaritet dhe një heshtje e rëndë që ndërpritet vetëm nga zhurma e zjarrfikëseve.
Miliona euro dëme, por ende pa shifra zyrtare
Në momentin që raportojmë, nuk ka ende një përllogaritje zyrtare të dëmit, por tregtarët dhe burime nga zona flasin për miliona euro mall të djegur. Tregu i “5 Majit” konsiderohet më i madhi në Tiranë dhe furnizues i një pjese të madhe të dyqaneve në kryeqytet dhe rrethe, çka e bën pasojën jo vetëm individuale, por edhe në gjithë zinxhirin e tregtisë.
Lexo edhe: Nga zjarret te përmbytjet, si u përball Shqipëria me pasojat e ndryshimeve klimatike në 2025-ën
Çdo orë që kalon pa akses në magazina rrit ankthin e bizneseve, të cilat nuk dinë as nëse do të arrijnë të shpëtojnë qoftë edhe një pjesë të mallit.
Çfarë do të ndodhë me bizneset?
Në ditët në vijim pritet shuarja e plotë e zjarrit dhe sigurimi i zonës, identifikimi i dëmeve për secilin tregtar. verifikimi nëse bizneset kanë ose jo sigurime dhe më pas, vendimet për mbështetje apo kompensim.
Por për shumë prej tyre, dëmi është tashmë i pakthyeshëm.
“Na u dogj gjithçka. Mall, borxhe, plane. Nuk është thjesht biznes, është jeta jonë”, – thotë një tjetër tregtar, duke mos pranuar të identifikohet.
Në rrugën “5 Maji”, sot nuk ka vetëm kapanone të djegura. Ka jetë të shkatërruara, investime të humbura dhe një pyetje : a do të ngrihet sërish ky treg dhe si?
Policia ka nisur hetimet për të zbardhur shkaqet e zjarrit. Burime paraprake bëjnë me dije se dyshohet një harresë e një ngrohëseje elektrike, por kjo mbetet ende për t’u konfirmuar zyrtarisht.Ekspertët pritet të hyjnë në zonë vetëm pasi të shuhet plotësisht çdo vatër aktive, për të kryer këqyrjen teknike dhe hetimore.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
