Më 28–30 Prill 2026, në Lushnje do të zhvillohet edicioni i pestë i Panairit Ndërkombëtar “Ditët e Bujqësisë”, eventi më i madh sektorial në Shqipëri dedikuar gjithë zinxhirit të vlerës të bujqësisë dhe blegtorisë.
I organizuar për të pestin vit radhazi në zemër të zonës më aktive bujqësore në vend, panairi është shndërruar në një pikë takimi për fermerë, agrobiznese, institucione financiare, ofrues të teknologjisë dhe aktorë institucionalë. Eventi organizohet me mbështetjen e Ministrisë së Bujqësisë dhe Zhvillimit Rural.
Një platformë që ofron mundësi reale për bizneset
“Ditët e Bujqësisë” nuk është vetëm një hapësirë ekspozimi, por një mjedis ku realizohen takime B2B, prezantime produktesh, forume profesionale dhe marrëveshje konkrete biznesi. Në edicionin e fundit, panairi mblodhi mbi 100 ekspozues nga sektorë të ndryshëm, përfshirë prodhimin bujqësor dhe blegtoral, makineritë dhe teknologjitë, institucionet financiare dhe organizatat ndërkombëtare.
Pjesëmarrja e kompanive nga Shqipëria dhe rajoni ka konfirmuar interesin në rritje për një platformë të strukturuar ku oferta dhe kërkesa takohen drejtpërdrejt, në terren.
Fokus në inovacion dhe zhvillim
Edicioni 2026 do të përfshijë pesë kategori kryesore ekspozimi:
- Prodhim bujqësor dhe blegtoral
- Makineri dhe teknologji
- Inovacion dhe qëndrueshmëri
- Zinxhiri i furnizimit dhe logjistika
- Institucione dhe shoqata
Paralelisht me ekspozimin, do të organizohen panele dhe forume diskutimi me ekspertë të sektorit, duke trajtuar temat më aktuale që lidhen me zhvillimin e bujqësisë dhe blegtorisë, investimet dhe tregjet.
Pse të ekspozosh në panairin “Ditët e Bujqësisë” në Lushnje?
Zhvillimi i panairit në Lushnjë, e konsideruar tradicionalisht si “hambari i Shqipërisë”, ofron akses të drejtpërdrejtë në një treg aktiv dhe me përqëndrim të lartë të fermerëve. Për kompanitë, kjo përkthehet në:
- kontakte të drejtpërdrejta me fermerë dhe blerës potencialë,
- mundësi për prezantim të produkteve dhe teknologjive në një audiencë të targetuar,
- krijim partneritetesh të reja biznesi,
- vizibilitet dhe promovim.
Bujqësia mbetet një nga sektorët më të rëndësishëm të ekonomisë shqiptare dhe një nga fushat me potencialin më të madh për investim, modernizim dhe përmirësim të proceseve të prodhimit dhe tregtimit. Rritja e interesit për financim, teknologji dhe zgjidhje inovative e bën këtë sektor gjithnjë e më tërheqës për kompanitë dhe institucionet financiare. Në këtë kontekst, panairi krijon një moment strategjik për bizneset që synojnë të prezantojnë zgjidhjet e tyre dhe të zgjerojnë praninë në një treg me potencial real zhvillimi.
Thirrje për pjesëmarrje
Organizatori i panairit ka hapur zyrtarisht aplikimet për ekspozuesit e edicionit 2026. Kompanitë e interesuara për të prezantuar produktet dhe shërbimet e tyre në këtë platformë sektoriale mund të aplikojnë për rezervimin e hapësirës së ekspozimit.
“Ditët e Bujqësisë 2026” do të zhvillohet më 28–30 Prill në Lushnje, duke synuar të mbledhë edhe në këtë edicion jubile aktorët kryesorë të sektorit në një hapësirë të përbashkët biznesi, dialogu dhe zhvillimi.
Për më shumë informacion mbi pjesëmarrjen si ekspozues, kompanitë mund të kontaktojnë:
e-mail: info@icebergexhibitions.com
mob: +355 69 406 3909
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
