Strategjia për forcimin e së drejtës së autorit dhe pronësisë intelektuale në Shqipëri kërkon rreth 600 milionë lek për katër vitet e ardhshme. Shifra del në draftin e publikuar për konsultim nga ana e Ministrisë së Financave dhe Ekonomisë.
Më shumë se gjysma e kësaj shifre, rreth 330 milionë lek parashikohen për rritjen e ndërgjegjësimit të publikut lidhur me të drejtat e pronësisë intelektuale përmes fushatave informuese të përqendruara te të rinjtë, aktiviteteve promovuese dhe hartim i moduleve për nxënësit e studentët.
160 milionë të tjera parashikohen shpenzime për zhvillimin dhe forcimin e institucioneve të përfshira në zbatimin e të drejtave të pronësisë intelektuale, përmes trajnimeve, rritjes së cilësisë së shërbimeve nga administrata dhe forcimi i kapaciteteve të saj. Pjesa e mbetur e parave kërkohet për përmirësimin e kuadrit ligjor dhe përafrimin e tij me BE dhe identifikimin e treguesve gjeografikë dhe emërtimeve të origjinës në zhvillimin ekonomik të vendit.
Ministria e Financave thotë se vlerësimi i kostove të nevojshme për zbatimin e kësaj strategjie deri në vitin 2025 është bërë në bazë të objektivave të parashikuara në planin e veprimit. Në këtë përllogaritje janë marrë parasysh programet buxhetore. Përllogaritja e kostos për pjesën më të madhe të objektivave është bërë duke pasur parasysh numrin e punonjësve që do të merren me aktivitetin, pagat e tyre dhe koha e realizimit të objektivave.
Burimet financiare bazohen pothuajse plotësisht te buxheti i shtetit, që do të mbulojë 467 milionë lekë, ndërsa hendeku prej 133 milionë lekësh parashikohet të mbushet nga donatorët, apo financime të huaja. Në dokument thuhet se struktura e ekonomisë që bazohet te shërbimet e bën edhe më të domosdoshme të drejtën e pronësisë intelektuale.
Strategjia vendos si objektiv që brenda vitit të ardhshëm të hartohet një reformë ligjore në fushën e pronësisë industriale dhe miratimi i ligjeve të veçanta organike për çdo objekt të pronësisë industriale, patentat dhe modelet e përdorimit, disenjot industriale, markat tregtare e të tjera.
Brenda vitit 2023 synohet aderimi me Ligj në Traktatin e Singaporit të Ligjit të Markave Tregtare. Viti 2023 vendoset si afat për hartimin dhe miratimin e projektvendimit për ngritjen e sistemit anti plagjiaturë të doktoratave, ndërsa deri në 2025 synohet lehtësimi i procedurave për regjistrim të së drejtës se autorit me qëllim që autorët e veprave te kryejnë regjistrimin e veprave të tyre online.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
