Prej 33 vitesh, doktor Skender Murtezani jeton e punon në New York, SHBA. Me një fokus të jashtëzakonshëm në karrierën e tij në fushën e mjekësisë, z.Murtezani, ka arritur të jetë shumë mirë njëkohësisht edhe një aktivist, atdhetar, duke u angazhuar në shumë çështje social-kulturore dhe politike.
Ndër misionet më të rëndësishme të tij është lobimi dhe puna e bërë për kthimin e eshtrave të atdhetarit Mit’hat Frashëri. Ndërsa tashmë ai dhe drejtues të Vatra Queens po punojnë për një tjetër mision, kthimin e eshtrave të figurës së madhe shqiptare, Fan Noli.
Dr. Murtezani, drejtues i Vatra Queens, është anëtar i Federatës “Vatra” që nga Festa e 28 Nëntorit 1990. “Kalova në “Vatër” kohën më të vështirë të saj, kohën e tranzicionit nga keqkuptimi i nacionalizmit në një fazë të re postkomuniste, që akoma vazhdon me manovra të kota, vetëm t’u hidhet hi syve problemeve të rëndësishme kombëtare si: Kosova, Mali i Zi, apo Lugina e Preshevës, pa shkuar më tej në Rozhajë apo Sanxhak të Pazarit të ri”, thotë ai. Me të njëjtën peshë Dr. Murtezani dhe “Vatra Queens” janë të shqetësuar edhe nga korrupsioni në politikën shqiptare.
“Detyra e Vatrës është të luajë rolin e një qendre defansive (qender e mbrojtjes së etnicitetit) siç e kanë etnitë e tjera në SHBA. Kjo qendër ka të drejtë të mbrojë dinjitetin kombëtar. Federata duhej të angazhohet që ne të jemi pararojë për krijimin e një të djathte të shëndoshë kombëtare, që na mungon aq shumë. Asnjë nga këto nuk u realizua”, thotë dr. Murtezani.
Ai kujton se, në kohën e editorit të ndjerë Dalip Greca, “Vatra” filloi ta gjejë veten, filloi të ecë ideja e formimit të degëve dhe shoqatave. Miqtë e “Vatrës” si në Zvicër, Tetovë dhe më tej, ashtu edhe në Queens, krijuan degën “Vatra Queens”, e regjistruar sipas ligjit amerikan, si degë e një entiteti të përbashkët, “Federatës”. Ai thekson se, “mundohemi që ta bindim komunitetin se filluam të veprojmë si qendër defanzive (mbrojtëse) dhe do të angazhohemi në krijimin e të djathtës së vërtetë, me persona që nuk kanë asgjë të përbashkët me ata që historikisht kanë mbrojtur interesin sllavo-grek, si rastin me politikat post Noliane”.
Dega “Vatra Queens”, u krijua në vitin 2013. Ajo ka formuar edhe dy nëndegë të pavarura: Asamblenë e Studentëve Shqiptaro-Amerikanë dhe Kolegjin e Mjekëve të Licensuar”. “Me Vatrën filluam një projekt shumë të rëndësishëm kombëtar. Sipas mendimit tonë, në Shqipëri mungonin figurat që do e forconin fondamentin komb dhe shtet të shqiptarizmit. Ata ishin dy persona që në mënyrë imediate duhet të riatdhesohen: Mit’hat Frashëri dhe At Fan Noli. Ne kemi bërë komemorimin e vdekjes së Mit’hat Frashërit, pasi identifikuam hotelin ku u gjet i vdekur, për 5 vite me radhë, para se të vendosë qeveria Rama të bëjë aktin patriotiko-historik dhe human dhe solli eshtrat e të madhit Mit’hat Frashëri të prehen në atdhe. Për këtë atdhe ai punoi deri në frymën e fundit”, thotë Dr.Murtezani.
Kishin rast edhe qeveritë e tjera ta bëjnë, tregon ai, ndërsa thekson se, “me At Nolin kemi ngecur, pasi vendimi i degës pas 10 viteve sugjerime dhe kërkesash, nuk e ka kaluar akoma pragun e Federatës që të vijë në atdhe. At Noli është një figurë kolosale e kombit tonë, që e ka mbrojtur orthodoksizmin shqiptar si syrin e tij. Tani, forcat që e luftuan në të gjitha drejtimet, bëjnë çmos që ai të mos riatdhesohet. Ai bëri çmos që të riatdhesojë Faik Konicën, pse mos të dojë të jetë pranë tij?! Ai është në varrezat publike dhe askush nuk ka të drejtë të marrë vendime kundër legatës së tij. Ne jemi një komb me tre fe dhe kur lind një patriot shqiptar, nga cilado fe, ai është në mbrojtjen e tre feve dhe te trija vendosin për lartësimin e veprave të tij”.
Sipas tij, “At Nolin e kërkon ajo tokë për të cilën bëri aq shumë. Atë e kërkojnë gjeneratat e reja të mësojnë legatën e tij, të mësojnë shqip në shkollat e kishës. Këtu, mbetën në provim të gjitha partitë e mëdha shqiptare, u shitën te armiku. Çfarë turpi!”.
Kush është dr. Murtezani dhe cili është rrugëtimi i tij profesional dhe patriotik?!
Ai shkoi në SHBA në qershor të vitit 1990, para 33 viteve. “E para dhe më e rënda ishte të ringjallem në mënyrë sa më pozitive në një botë të re, duke nisur nga fillimi, të bind botën rreth meje dhe më gjerë se kush jam, cilat janë qëllimet e mia të mira ndaj familjes dhe rrethit observues dhe hulumtues, ndaj profesionit paqedashës ndaj shoqërisë së re. Këtë e bëra me punë dhe heshtje”, tregon ai. Me veprat e tij, ka synuar t’i bindë të gjithë për figurën e tij pozitive, me një rol konstruktiv në shoqëri. Një dëshirë në realizim e sipër, siç e quan ai.
E ka nisur duke u angazhuar si shpërndarës i rezultateve në një ndertëse me doktorë të specializimeve të ndryshme. “Aty takoja shpesh drejtorin e departmentit të Endokrinologjisë Dr. Poretski, i cili një ditë me pyeti se ku kisha dëshirë të punoj. I thashë se gjithmonë kam ëndërruar që të marr pjesë në një punë hulumtuese mjekësore, në këtë mënyrë do të “zhytesha” në themelet e profesionit tim të mjekësisë, që është qeliza dhe aparati i tij”. Dr. Poretski e drejtoi në një projekt të famshëm, me grant nga NIH në Rockefeller University, në mbikëqyrje të Dr. Leon Bradlow. Ky grant kishte të bënte me metabolitet e dobishme dhe të dëmshme të Estrogjenit. Pas 2 vitesh Dr. Bradlow e referon në Departmentin e Endokrinologjisë në NYU, ku mbaroi me sukses 3 vite të “Endocrine Research Fellowship” në mbikqyrje të Dr. Charles Hollander, Drejtor i Departmentit dhe Drejtor i CRC (Clinical research center për NYUMC).
Aty vazhdoi hulumtinin e hormoneve të stresit dhe ndikimin e tyre në shëndetin e njeriut. Ndërkohë, studioi për provimet USMLE, që të kalonte kështu në mjekësinë klinike, një rrugëtim shumë i vështirë, por rekomandimet që dok, Murtezani kishte, vinin nga persona me emër në mjekësisë amerikane dhe kjo sfidë u kalua me sukses. Përvoja e shkëlqyshme në hulumtime më vonë e ndihmoi që të jetë pjesë e programit Master of Science në Cornell, e dizajnuar për Doktor të mjekësisë me përvojë në hulumtime. Pas mbarimit me sukses atij iu dha titulli “Master of science” në Clinical Epidemiology and health care research. Sot ai është asistent profesor i mjekësisë klinike pranë Cornell University.
Të gjithë hapat në ngritjen e tij profesionale kanë qenë me plan dhe suksesi nuk ka munguar. “Kështu i këshilloj edhe sot studentët e mjekësisë, ku ligjeroj në Cornell”, tregon ai.
Për t’i përmbledhur sukseset e tij më të mëdha në profesion, ato lidhen me hulumtime me publikimet domethënëse, puna në zbulimin e hormonit të ri me rëndësi imunologjike, kalimi i tre provimeve të rëndësishme dhe të nivelit të barabartë me studentët amerikanë, specializimi në mjekësinë interne në programin e Cornell-it, “Master of Science” në klinikën epidemiologjike të kërkimit në shërbimin shëndetësor, në Weill Cornell Graduate School of Medical Sciences. Asistent profesor në mjekësinë klinikë në Weill Cornell Medicine në New York City. Pjesa e mjekësisë në librin “Mendime dhe opinione në shekullin 21” , “I thashë po Shqipërisë 2013”, “100 histori suksesi për 100 vite Shqipëri”, etj.
“Mendoj se me globalizimin e jetës dhe shkencës, sot nuk ka nevojë për lëvizje ekstreme nga baza. Kur flasim për mjekësinë si shkencë dhe profesion, anatomia, fiziologjia patologjia dhe trajtimet janë kudo të njëjta. Problemi është të ekonomia dhe organizimi i sistemit shëndetësor. Shqipëria jonë patjetër të ndjekë rrugën e pa kontestueshme të mjekësisë për të mirën e atij që ka nevojë, e jo të politikës apo egoizmit, mos të them keqpërdorimit”, thotë z Murtezani.
Disa nga ndërhyrjet më të rëndësishme të “Vatra Queens”:
Dega “Vatra Queens” ka kërkuar bashkimin e ligave të sportit, të gjitha sporteve Kosovë- Shqipëri.
Në kohën e tërmetit në Shqipëri ka kërkuar që një nga qendrat në Californi të hapë qendrën e hulumtimit në Shqipëri.
Pas lojës Serbi-Shqipëri në Beograd, i dërguan letër UEFA-s që ta rishqyrtojë vendimin paraprak kundër Shqipërisë.
Mesazhi i dr. Murtezanit është se, “Komuniteti mund të bëjë më tepër, por brumi ynë ende për të disatën herë është duke kaluar në fazën e qytetërimit, prandaj, me frikë e pranon idenë e të qenurit bashkë”.
Artikulli u publikua në numri 33 të revistës Business Magazine Albania. Business Magazine Albania është revista e parë digjitale me përmbajtje origjinale në shqip të orientuar nga fusha e biznesit. Ju mund Abonoheni dhe të Shfletoni Këtu nr. 33 të saj.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
