Mbreti i Marokut, Mohammed VI, ka hapur një nga elektranat më të mëdha në botë që përdor diellin e Saharasë për prodhimin e energjisë së gjelbër.
Kostoja e të gjithë projektit është 3.9 miliardë dollarë, ndërsa elektrana që gjendet në qytetin Ouarzazate, në jug të Marokut, quhet Noor I. Por, kjo është vetëm pjesa e parë e projektit që synon të prodhojë rrymë për 1.2 milion marokenë, raporton AP. Është parashikuar që kështu të sigurohen 120-165 MW rrymë.
Agjencia Climate Investment Funds, që ka dhuruar 435 milionë dollarë për këtë projekt, thekson se ky do të jetë centrali më i madh i energjisë diellore, që do të ruajë energji edhe për periudhat kur nuk ka diell.
Maroku është zgjedhur për këtë projekt për shkak të stabilitetit politik, si dhe për faktin se Qeveria marokene ka themeluar Agjencinë për Energji Diellore, ndërsa futi masa për zvogëlimin e përdorimit të lëndëve djegëse. Me fjalë të tjera, derisa Tunizia dhe Egjipti janë marrë me të ashtuquajturën Pranvera Arabe, Maroku ka avancuar në aspektin teknologjik dhe të legjislacionit, shkruan AP.
“Ky projekt është dëshmi për vendet tjera të cilat thonë se nuk ka shpresë për ata që nuk janë të pasur me naftë”, ka thënë Hakima El Haite, ministrja marokene e Mjedisit.
Aktivistët megjithatë thonë se duhen burime të mëdha për ftohje të elektranës, pra ujë nga hidroelektrana Mansour Eddahbi, gjë që do të shkaktojë probleme në kohë të thatësirave të mëdha.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
