Dërgesat e emigrantëve ranë me 10 % në tremujorin e parë të vitit duke qenë 14.3 milionë euro më të ulëta se sa e njëjta periudhë e një viti më parë.
Të dhënat e fundit zyrtare nga Banka e Shqipërisë tregojnë se për periudhën Janar-Mars të këtij viti emigrantët dërguan pranë familjeve të tyre rreth 128.1 milionë euro nga 142.4 milionë që dërguan në tremujorin e parë të vitit të kaluar.
Dërgesat e emigrantëve arritën kulmin në vitin 2007 me rreth 1 miliardë euro. Por pas këtij viti ato kanë ardhur vazhdimisht në rënie. Vitin e kaluar tendenca u duk sikur u përmbys.
Në gjashtë muajt e parë të 2015-ës dërgesat e emigrantëve shënuan rritje me mbi 18 %. Por ritmi i tyre u ngadalësua ndjeshëm në tremujorin e tretë dhe atë të katërt duke e tkurrur rritjen vjetore në vetëm 1 %. Shkaku kryesor ishte shpërthimi i krizës në Greqi, që kulmoi me vendosjen e kufizimeve mbi daljen e kapitalit.
Dërgesat e emigrantëve kanë qenë një nga burimet kryesore të financimit për konsumin e familjeve. Rënia e tyre ka ndikuar negativisht në ecurinë e konsumit privat në ekonomi, i cili vitin e kaluar ra për herë të parë që nga 1997-a.
Të dhënat zyrtare nga Instituti i Statistikës tregojnë se mbi 30 % e popullisë shqiptare jeton në emigrim dhe destinacionet kryesore janë Greqia me Italinë, në të cilat mendohet se jetojnë mbi 900 mijë shqiptarë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
