Ideja se AI do të bëhet më e mençur se ne dhe se ne do ti shërbejmë asaj, përveç që është kërcënuese, është gjithashtu një temë që na bën të reflektojmë. Filma si “The Matrix” dhe “Terminator” na japin një pamje të errët për të ardhmen e teknologjisë.
Sam Altman, CEO i OpenAI, thotë se AI e superinteligjencës mund të jetë vetëm disa vite larg. Në një postim në blog të titulluar “Epoka e Inteligjencës”, ai shprehet: “Është e mundur që ne të kemi superinteligjencë në disa mijëra ditë; ndoshta do të zgjasë më shumë, por jam i sigurt se do ta arrijmë.” Ai thekson se fuqia e ‘deep learning’ është një provë se hapat e ardhshëm në këtë teknologji mund të jenë më të lehtë dhe më të shpejtë se sa mendojmë.
Altman shpjegon se njerëzimi ka zbuluar një algoritëm që mund të mësojë çdo lloj të dhëne dhe se sa më shumë të dhëna dhe kapacitet llogaritës kemi, aq më mirë AI do të ndihmojë në zgjidhjen e problemeve të vështira. Ai e quan këtë një përparim të rëndësishëm dhe shton se, pavarësisht sfidave që na presin, deep learning (mësimi i thellësishëm) po funksionon dhe do të zgjidhen edhe problemet e tjera të komplikuara botërore. Sipas tij, AI mund të na ndihmojë të arrijmë suksese të jashtëzakonshme, si zgjidhja e problemeve klimatike, krijimi i kolonive në hapësirë dhe zbulimi i ligjeve të reja në fizikë.
Lexo edhe: “Meta Connect 2024”: Prezantohen “Orion”, syzet më të avancuara në botë!
Por çfarë është superinteligjenca? Ideja është se një AI mund të bëhet më e mençur se njerëzit dhe të funksionojë në mënyrë të pavarur. Ndërsa OpenAI po punon për të arritur inteligjencën artificiale të përgjithshme (AGI), e cila do të jetë në nivelin e inteligjencës njerëzore, por niveli më i lartë i saj, superinteligjenca, duket se është në mendjen e Altman-it për të ardhmen e afërt.
Kjo është e kuptueshme, duke pasur parasysh që Ilya Sutskever, një nga bashkëthemeluesit e OpenAI, ka lënë kompaninë për t’u fokusuar në ndërtimin e superinteligjencës me një startup të ri që ka marrë tashmë financim prej 1 miliard dollarësh.
Në fund të fundit, pyetja është: Si do të ndikojë kjo teknologji në jetën tonë? Do të jetë një ndihmës apo një kërcënim? Rrugëtimi i inteligjencës artificiale është ende në fillim, por është një temë që meriton vëmendje dhe diskutim të hollësishëm për të gjitha llojet e ndikimit të saj në jetën tonë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
