Në ekosistemin e startupeve, ku shpejtësia dhe rreziku shpesh shiten si receta të sigurta suksesi, Chelsea Hirschhorn, themeluese dhe CEO e kompanisë Frida, ka zgjedhur të ecë në drejtim të kundërt. Dhe pikërisht kjo zgjedhje, thotë ajo, është kthyer në strategjinë e saj më fituese si lidere.
Ndryshe nga profili klasik i themeluesit që “lëviz shpejt dhe thyen rregulla”, Hirschhorn e ka ndërtuar Frida-n me qetësi, organizim dhe vendime të menduara mirë. Në një intervistë për podcastin CNBC Changemakers and Power Players, ajo shprehet se kjo qasje, që shpesh nuk konsiderohet “e bukur” në botën e biznesit, është në fakt forca e saj kryesore.
Një rrugë jo e zakonshme drejt sipërmarrjes
Para Frida-s, Hirschhorn ishte avokate falimentimi, një profesion larg botës së produkteve për fertilitet, shtatzëni dhe foshnja. Megjithëse ambicioze, ajo e përshkruan veten si një person që nuk e kërkonte rrezikun.
Ideja për biznesin erdhi rastësisht, pas një dhurate nga një fqinj: NoseFrida, një pajisje suedeze për pastrimin e hundës së foshnjave. Hirschhorn pa menjëherë potencialin dhe mori një vendim vendimtar: bleu biznesin dhe në vitin 2014 e lançoi Frida-n, me NoseFrida si produktin kryesor.
Kalimi nga një karrierë e sigurt drejt sipërmarrjes nuk ishte i lehtë. Ajo pranon se pa mbështetjen dhe inkurajimin e bashkëshortit të saj, sot president i kompanis, hapi do të kishte qenë shumë më i vështirë.
Rritje e qëndrueshme, jo garë për shpejtësi
Që në fillim, Hirschhorn vendosi të mos ndjekë rrugën tradicionale të financimit me venture capital. Për Frida-n, rritja e shpejtë nuk ishte qëllim në vetvete.
“Ne nuk po ndërtonim për t’u rritur sa më shpejt, por për të ndërtuar saktë,” shprehet ajo.
Kjo filozofi e ndihmoi kompaninë të zhvillohej me baza të forta, duke shmangur presionin për zgjerim të menjëhershëm dhe vendime impulsive, një tjetër shembull i gatishmërisë së saj për të shkuar kundër rrymës.
Një stil lidershipi që ka evoluar
Në fazat e para të Frida-s, Hirschhorn ishte e fokusuar pothuajse ekskluzivisht te objektivat dhe ndërtimi i strukturës së biznesit. Ajo priste që ekipi të ndiqte të njëjtin nivel përkushtimi dhe disipline.
Me kalimin e viteve, stili i saj i drejtimit ka ndryshuar ndjeshëm. Sot, ajo e vlerëson lidershipin si një proces empatik, transparent dhe të ndjeshëm ndaj motivimeve personale të secilit punonjës.
Një ndikim të fortë ka pasur edhe përvoja e saj si nënë që punon, e cila e ka bërë më të vetëdijshme për kompromiset mes jetës personale dhe asaj profesionale.
Në Frida, kjo filozofi reflektohet edhe në përfitime jo të zakonshme për stafin, si shërbime javore estetike, që për Hirschhorn nuk janë luks, por mënyrë konkrete për të respektuar kohën dhe mirëqenien e ekipit.
Historia e Chelsea Hirschhorn sfidon idenë se suksesi vjen vetëm nga guximi ekstrem dhe rritja e shpejtë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
