Kompania mëmë e TikTok, ByteDance, ka avancuar më tej zhvillimet e saj në fushën e inteligjencës artificiale (AI), duke krijuar një sistem robotik që mund të kryejë detyra të përditshme shtëpiake si palosja e rrobave dhe pastrimi i tavolinës. Sistemi përdor inteligjencë artificiale që i mundëson robotëve të ndjekin komanda të shprehura në gjuhë natyrore dhe të realizojnë detyra të përgjithshme. Kina, vendi ku është e bazuar ByteDance, po zhvillon këtë teknologji me ritme marramendëse, përmes platformave si DeepSeek dhe Manus.Sipas gjigantit të dizajnimit të çipeve, Nvidia, robotika është faza e ardhshme e zhvillimit të AI-së. Arsyeja? Për vite me radhë kompanitë teknologjike janë përpjekur të ndërtojnë robotë me qëllim të përgjithshëm, por programimi i tyre është një sfidë më vete. Me ndërhyrjen e AI-së, kjo sfidë po bëhet shumë më e lehtë për t’u kapërcyer.
Çfarë ka bërë konkretisht ByteDance?
Kompania ka ndërtuar një model të madh “shikim-gjuhë-veprim” (Vision-Language-Action, ose VLA) të quajtur GR-3, i cili i mundëson robotëve të kuptojnë dhe ndjekin komanda në gjuhë të natyrshme dhe të realizojnë detyra të përgjithshme. GR-3 mund të përfytyrohet si “truri” i robotit.
Në eksperimentin e saj, ByteDance përdori një robot të quajtur ByteMini. Pasi modeli GR-3 u instalua në të, roboti arriti të vendoste një këmishë në një varëse dhe më pas ta varte në raft. Në një video të shpërndarë nga kompania, shihet gjithashtu roboti duke marrë objekte të ndryshme shtëpiake dhe duke i vendosur në vendet e caktuara. Ai ishte në gjendje të dallonte përmasa të ndryshme, duke ndjekur me sukses urdhrin për të marrë “pjatën më të madhe”.
Lexo edhe: ChatGPT nuk është terapisti yt i sigurt, Sam Altman ngre alarmin
Roboti përfundoi gjithashtu edhe detyra si pastrimi i tavolinës së ngrënies. Departamenti Seed i ByteDance, i cili udhëheq kërkimin në fushën e inteligjencës artificiale dhe zhvillimin e modeleve të mëdha gjuhësore (LLM), deklaroi se modeli GR-3 është trajnuar me të dhëna nga imazhe dhe tekste, dhe më pas është përsosur me të dhëna që burojnë nga ndërveprimet e njerëzve në realitet virtual. Për më tepër, roboti është mësuar edhe duke kopjuar lëvizjet e robotëve realë. Krijimi i këtij sistemi të ri vjen në një moment kur ByteDance po përqendron gjithnjë e më shumë vëmendjen në zhvillimin e inteligjencës artificiale, që prej themelimit të departamentit Seed në vitin 2023.
Tensionet politike vazhdojnë
Ndërkohë, kjo arritje teknologjike ndodh në një kohë kur TikTok po përballet me një tjetër kërcënim për ndalim në Shtetet e Bashkuara, përveç nëse kompania pranon të shesë asetet e saj amerikane.
Sekretari amerikan i Tregtisë, Howard Lutnick, përsëriti këtë qëndrim të enjten, duke deklaruar: “Kina mund të mbajë një pjesë të vogël, ose ByteDance, pronari aktual, mund të mbajë një pjesë të vogël. Por në thelb, amerikanët do të kenë kontrollin. Amerikanët do të zotërojnë teknologjinë, dhe amerikanët do të kontrollojnë algoritmin.”
Ai shtoi për CNBC se nëse kjo nuk ndodh, “TikTok do të fiket dhe këto vendime po afrojnë shumë shpejt.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English