Bursa e studimit “NextGen Tech & Entrepreneurship” – Një hap për të ardhmen

Nga Arkelino Hila, kontributor

Si një ish-nxënës i shkollës jopublike 9-vjeçare “Albanet”, ku kam studiuar për nëntë vite së bashku me vëllain tim, gjithmonë kam ndjerë një lidhje të fortë me këtë institucion dhe një dëshirë të madhe për të kontribuar në zhvillimin e brezave të ardhshëm. Aktualisht, punoj për S&P Global në New York si MBS Specialist, duke qenë vazhdimisht në kontakt me botën e inovacionit, financës dhe teknologjisë. Me një bachelor në teknologji dhe sipërmarrje ne New York, kam pasur gjithmonë dëshirën për të nisur iniciativa që krijojnë impakt pozitiv në Shqipëri, veçanërisht për të rinjtë.

Qëllimi i bursës

Bursa “NextGen Tech & Entrepreneurship” ka për synim të frymëzojë dhe të ndihmojë nxënësit e grupmoshës 14-15 vjecare të ndërmarrin hapat e parë në krijimin e një produkti inovativ. Programi synon:

• T’u mësojë nxënësve se çfarë është një ide inovative dhe si të zhvillojnë një plan të thjeshtë biznesi.
• T’i ndihmojë ata të kuptojnë një nevojë reale dhe si mund ta adresojnë atë përmes teknologjisë.
• T’u mundësojë prezantimin e ideve të tyre përpara një jurie dhe fitimin e një burse financiare për të zhvilluar më tej produktin e tyre.

Struktura e programit

Java 1: Prezantimi i konkursit & gjenerimi i ideve

• Diskutimi i koncepteve të inovacionit dhe sipërmarrjes.
• Identifikimi i problemeve të përditshme që mund të zgjidhen përmes teknologjisë.
• Dorëzimi i ideve fillestare në formë të shkruar.

Java 2: Studimi – A ka nevojë për këtë produkt?

• Nxënësit bëjnë kërkime dhe intervistojnë miq, familjarë dhe mësues.
• Analizojnë se kush do ta përdorte dhe pse është e dobishme.

Java 3: Krijimi i planit të thjeshtë të biznesit

• Përshkrimi i idesë përmes pesë pyetjeve kryesore mbi problemin, audiencën, mënyrën e realizimit dhe konkurrencën.

Java 4: Skicimi i produktit

• Skicimi i produktit në formë vizuale dhe përshkrimi i resurseve të nevojshme për ndërtimin e tij.
• Mentorët ndihmojnë në përmirësimin e ideve.

Java 5: Testimi me përdoruesit

• Prezantimi i idesë te persona të ndryshëm për të marrë reagime.
• Përmirësimi i produktit bazuar në kritikat dhe sugjerimet e marra.

Java 6: Branding/Imazhi – Si ta bëjmë tërheqës produktin?

• Krijimi i emrit, logos dhe sloganit të produktit.
• Përgatitja e një prezantimi të thjeshtë dhe të qartë.

Java 7: Përgatitja për prezantimin

• Struktura e prezantimit: problemi, zgjidhja dhe vlera e idesë.

Java 8: Praktikimi i prezantimit

• Mentorët ndihmojnë në përsosjen e mënyrës së prezantimit.

Java 9: Raundi gjysmëfinal

• Prezantimi për një grup të vogël përzgjedhës.

Java 10: Finalja – Prezantimi për jurinë

• Finalistët prezantojnë përpara një jurie ekspertësh dhe fituesi merr bursën dhe financimin për zhvillimin e produktit.

Monitorimi dhe mentorimi

Programi do të monitorohet nga vetë shkolla dhe mësuesit, por nxënësit do të kenë gjithashtu mentorë ish-nxënës të shkollës ose ekspertë të fushës që do t’i ndihmojnë gjatë gjithë procesit. Kjo do t’u mundësojë atyre të marrin udhëzime praktike dhe këshilla nga individë me përvojë në teknologji dhe sipërmarrje.

Shembuj të ideve për produktet e nxënësve

• Aplikacion për organizimin e detyrave të shtëpisë.
• Abonim elektronik për transportin publik.
• Platformë për të mësuar gjuhë të huaja në mënyrë interaktive.
• Pajisje që ndihmon prindërit të mbajnë mend oraret e fëmijëve.
• Ide inovative për riciklim në shkolla.
• Lojë edukative për historinë shqiptare.
• Sistem për të gjetur librat më të lirë online.

Lexo edhe: Lançohet programi ri i BE-së me sektorin bankar për të mbështetur gratë sipërmarrëse në të gjithë Evropën

Si do të vlerësohen idetë?

1. Dobia dhe aplikueshmëria e idesë.
2. Thjeshtësia dhe qartësia e konceptit.
3. Cilësia e prezantimit.
4. Angazhimi i nxënësve gjatë programit.

Një hap përpara për arsimin në Shqipëri

Si një i apasionuar pas sipërmarrjes dhe teknologjisë, besoj se arsimi në Shqipëri ka nevojë për iniciativa të tilla inovative që lidhin të tashmen me të ardhmen. Dua të falënderoj drejtoreshën e shkollës jopublike “Albanet” Znj.Irena Mane për mbështetjen dhe gatishmërinë e saj për të realizuar këtë nismë, duke shpresuar që kjo të jetë vetëm fillimi i shumë iniciativave të tjera në fushën e teknologjisë dhe sipërmarrjes për të rinjtë shqiptarë.