Brenda muajit qershor qytetarët shqiptar pritet të marrinë në dorë për herë të parë prerjen 10 mijë lekë, që është pjesë e serisë së re të kartëmonedhave. Banka e Shqipërisë njofton që ka përfunduar prodhimi i saj dhe brenda 6 muajve të parë të 2021 do hidhet në treg. Nga ana tjetër ky institucion është gati të nënshkruaj kontratat me kompanitë fituese për prerjet 500 lekë dhe 2000 lekë.
Kartëmonedha 10 mijë lekë do të pasqyrojë figurën e poetit të njohur shqiptar, Asdrenit, kombinuar me simbolet figurative të ‘Flamurit Kombëtar’, si dhe një varg të zgjedhur nga ‘Himni Kombëtar’, ‘Rreth flamurit të përbashkuar/me një dëshirë’ e një qëllim’. Por imazhi i kartëmonedhës nuk është bere ende publik. Ndërsa dy kartëmonedhat e tjera 500 lekë dhe 2000 lekë sipas bankës do të hidhen në treg deri në fund të këtij viti. Imazhi i tyre është bërë publik, ato janë me elemente të shtuara sigurie, janë më të modernizuara dhe cilësore. Ndërkaq prerja 200 dhe 5000 Lekë u hodh në qarkullim në 30 shtator të vitit 2019, dhe sipas të dhënave të bankës qendrore deri në fund të vitit 2020, 70% e kartëmonedhave 200 lekë që qarkulloi ishin të serisë së re, dhe 25% e 5000 lekëshit që ishte në treg i përkiste serisë së re.
Prerjet 500, 1 mijë dhe 2 mijë lekë ishin parashikuar të hidheshin në treg që në vitin 2020, por si pasojë e pandemisë të gjitha afatet u shtynë për këtë vit, pasi sipas Bankës së Shqipërisë COVID-19 pezulloi punën për prodhimin e kartëmonedhave. Seria e re e kartëmonedhave është prodhuar me teknologjitë më të fundit në fushën e prodhimit dhe elementeve të sigurisë së kartëmonedhave, me qëllim që ato të jenë më të sigurta, duke ia bërë “më të vështirë jetën” falsifikatorëve. Të gjitha prerjet e serisë së vjetër të kartëmonedhave dhe monedhave shqiptare, përveç asaj 2000 Lekë ishin miratuar në vitin 1995 dhe u hodhën në qarkullim në vitin 1996. Ndërkohë, në vitin 2008, serisë iu shtua kartëmonedha 2000 Lekë dhe në fund të vitit 2011 përfundoi kursi ligjor për kartëmonedhën 100 Lekë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
