Bllokohet ligji i rivlerësimit të pronave, NAREA kërkesë Presidentit për vonesën

Shoqata Kombëtare e Ndërmjetësve të Pasurive të Paluajtshme të Shqipërisë (NAREA) i ka drejtuar një kërkesë zyrtare Presidentit të Republikës, Bajram Begaj, duke kërkuar dekretimin sa më të shpejtë të Ligjit Nr. 85/2025 “Për Rivlerësimin e Pasurisë së Paluajtshme”, të miratuar nga Kuvendi më 12 dhjetor 2025.

Në reagimin e saj, NAREA shpreh shqetësim për vonesën e paarsyeshme të dekretimit, e cila sipas shoqatës po pengon botimin e ligjit në Fletoren Zyrtare, hyrjen në fuqi nga 1 janari 2026 dhe përgatitjen e akteve nënligjore të nevojshme për zbatimin e tij.

“NAREA bën thirrje që të dekretohet sa më parë të Ligjit Nr. 85/2025 datë 12.12.2025 “Për Rivlerësimin e Pasurisë së Paluajtshme”, për të përshpejtuar botimin në fletoren zyrtare dhe për pasojë hyrjen në fuqi si dhe emetimin e Akteve Nënligjore. Njëkohësisht, NAREA kërkon angazhimin sa më parë dhe bashkëpunimin e të gjithë Institucioneve, duke filluar nga Qendra e Botimeve Zyrtare, Ministria e Financave dhe Agjencia Shtetërore e Kadastrës në nxjerrjen sa më parë të Akteve Nënligjore dhe Udhëzimit të Përbashkët për zbatimin e Ligjit Nr. 85/2025 datë 12.12.2025 “Për Rivlerësimin e Pasurisë së Paluajtshme”, thuhet në kërkesën e NAREA.

Shoqata thekson se ligji përbën një zhvillim të shumëpritur për tregun e pasurive të paluajtshme dhe qytetarët, duke prekur drejtpërdrejt rreth 500 mijë familje shqiptare që synojnë rivlerësimin e pasurisë së tyre sipas vlerës së tregut. Po ashtu, sipas NAREA-s, ligji pritet të ndikojë pozitivisht edhe për dhjetëra mijëra familje të tjera, duke krijuar alternativa më të përballueshme strehimi nëpërmjet rritjes së ofertës në treg.

NAREA nënvizon se ka qenë e angazhuar për më shumë se 12 muaj në procesin e hartimit dhe diskutimit të ligjit, në bashkëpunim me Ministrinë e Financave, Komisionin e Ekonomisë dhe Financave dhe ligjvënësit, duke e konsideruar miratimin e tij si rezultat të një pune të gjatë dhe të koordinuar.

Lexo edhe: Rritje e brishtë/ Sektoret tradicionale bien, shërbimet mbajnë në këmbë ekonominë

Megjithëse shoqata ka shprehur rezerva për disa elementë të ligjit, përfshirë normën e tatimit 5% për banesat dhe zbatueshmërinë e amortizimit 1% për çdo vit vjetërsie, ajo vlerëson se shtyrja e mëtejshme e dekretimit do të kishte pasoja edhe më negative, duke rritur pasigurinë dhe stresin në tregun imobiliar, i cili prej më shumë se 18 muajsh përballet me presione inflacioniste.

Ligji “Për Rivlerësimin e Pasurisë së Paluajtshme” u jep individëve dhe bizneseve të drejtën të rivlerësojnë pronat e tyre me vlerën e tregut nga 1 janari deri më 31 dhjetor 2026, përmes ekspertëve të licencuar ose Agjencisë Shtetërore të Kadastrës. Tatimi për rivlerësimin do të jetë 5% mbi diferencën mes vlerës së mëparshme të pronës dhe vlerës së re të përcaktuar nga rivlerësimi.