Çmimet e blerjes së energjisë në bursën hungareze, të cilës i referohet edhe Shqipëria mbeten në nivele stratosferike, pavarësisht uljes krahasuar me një muaj. Aktualisht, këtë fillim shtatori, çmimi mesatar i blerjes së energjisë rezulton rreth 494 euro/MWh, duke shënuar një ulje të ndjeshme në raport me gushtin, kur rezultuan mbi 700 euro/MWh.
Përgjatë gushtit, Korporata Elektroenergjetike ka blerë energji në import për një çmim mesatar prej 483 euro/MWh, një shifër rreth 8 herë më e lartë krahasuar me të një vit më parë, kur KESH e siguronte atë për rreth 60 euro/MWh.
Vetëm përgjatë 8-mujorit, KESH ka shpenzuar për blerjen e energjisë 305 milionë euro, një faturë e kripur në këtë periudhë krize energjie, në një kohë kur vitin e kaluar ajo shkonte 285 milionë euro për të gjithë vitin 2021.
Lexo edhe; Rritet importi i energjisë në 6 mujor. Hidrocentralet private prodhuesit kryesor në vend
Megjithatë, sipas projeksioneve në bursën hungareze të energjisë HUPX, pritet që çmimi të ulet më tej në 350 euro/MWh. Por, sërish krahasuar me një vit më parë këto çmime janë shumë më të larta.
Situata nuk duket optimiste në kushtet kur dimri është afër dhe nevojat për energji janë edhe më të mëdha, duke e bërë edhe më të papërballueshme faturën nëse mungojnë reshjet.
Sipas KESH, aktualisht blerjet energjisë në bursa janë ndalur dhe nevojat me energji po mbulohen nga prodhimi vendas. Në varësi të ecurisë së tregjeve do të shihet edhe mundësia për hapjen e procedurave të ankandeve të reja për importin e energjisë.
Niveli i hidrocentralit të Fierzës është në kuotën e rreth 270 m mbi nivelin e detit, poshtë mesatares historike. Ndërkohë, rezerva energjetike është 499 GWh.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
