BEACH MASTER – Nga një problem i përditshëm në një zgjidhje. Si një aplikacion shqiptar po revolucionarizon mikpritjen dhe përvojën e pushimeve

Nga Adelina Onuzi – Pushimet e verës janë më shumë sesa një përvojë. Po a keni menduar ndonjëherë, çfarë ndodh kur kjo përvojë nis me stresin e gjetjes së një shezlloni bosh nën diellin përvëlues të korrikut a gushtit? Ose kur porosia jote “humbet rrugës” mes vapës dhe rrëmujës së sezonit turistik?

Nga një nevojë e nxitje personale lindi Beach Master, një platformë që nuk premton vetëm shezllonin tënd në vijën e parë, por edhe një mënyrë më të zgjuar për të menaxhuar pushimet apo vetë biznesin. Në këtë intervistë për Business Magazine, flasim me krijuesit e këtij aplikacioni që po digjitalizon bregdetin shqiptar me një vizion ambicioz që shkon përtej pushimeve verore.

Si lindi Beach Master? Cili ishte momenti kur kuptuat se tregu kishte nevojë për një zgjidhje të tillë?

Beach Master është produkt i eksperiencës së një grupi të madh njerëzish, duke nisur nga vetja, familja, miqtë dhe mikeshat e mia, të cilat përballen vazhdimisht me sfidën e gjetjes së shezllonëve në plazhet e Shqipërisë, sidomos në periudhën e pikut. Këto përshtypje i kam marrë edhe nga miq dhe kolegë të huaj që kanë vizituar plazhet këtu.

Ndërkohë, kjo situatë nuk haset vetëm nga pushuesit, por edhe nga bizneset. Të cilat në periudhën e pikut përballen me një ngarkesë të shtuar, e cila ka nevojë për mirëmenaxhim. Shqipëria është një vend turistik dhe kjo reflektohet në numrin e vizitorëve të huaj, i cili vitin e kaluar kaloi shifrën e 11 milionëve. Në momentin që kjo kërkesë ekziston dhe është evidente, duhet të krijohen mekanizmat për ta menaxhuar atë. Beach Master mori këto eksperienca dhe këtë kerkesë dhe e kthehu në një produkt si për pushuesin ashtu edhe për biznesin. 

Në fund të fundit, ne shkojmë në plazh për të pushuar, ndërkohë që bizneset në fushën e mikëpritjes mund të ofrojnë shërbimin e tyre më mirë, në mënyrë efiҫente, duke shmangur kostot shtesë dhe eleminuar pakënaqësitë.

Në një treg si i yni, ku shumë procese menaxhohen ende në mënyrë tradicionale, çfarë vështirësish keni hasur në prezantimin e teknologjisë tek bizneset e plazhit?

Si çdo produkt i ri, veçanërisht ato teknologjike edhe Beach Master kalon një fazë pranimi si nga përdoruesit, ashtu edhe nga bizneset. Por, në një moment kur problematika është evidente dhe Beach Master vjen si zgjidhje, qasja bëhet më e hapur dhe pranuese. Pikëpyetja për shumicën qëndron te mënyra se si do ta përdorin dhe si mund ta bëjnë pjesë të operacioneve të tyre.