Bashkimi Europian do të vendosë tarifa ndaj automjeteve elektrike të importuara nga Kina, tha të enjten zëdhënësi i Komisionit Europian.
Kjo masë vjen pas një hetimi që zbuloi se automjetet elektrike që prodhohen në Kinë mbështeten nga subvencionime të padrejta financiare, që përbëjnë kërcënim për prodhuesit europianë dhe dëmtojnë tregun europian për automjetet elektrike.
“Vendosja e tarifave nuk është qëllim në vetvete. Por është një mjet për të korrigjuar situatën e një konkurrence të padrejtë dhe të pabarabartë”, tha zëdhënësi i Komisionit Europian, Eric Mamer.
“Na nevojitet një zgjidhje që korrigjon avantazhin e padrejtë që u është dhënë prodhuesve në Kinë”, shtoi ai.
Hetimi 9 mujor i kryer nga Komisioni Europian përfshiu vizita në Kinë, diskutime më disa entitete të prekura, si edhe me vendet anëtare të Bashkimit Europian.
Komisioni Europian po ashtu tha se mirëpriste faktin që konsultimet me qeverinë kineze po vazhdojnë me qëllim që të arrihet një zgjidhje që është në përputhje me parimet e Organizatës Botërore të Tregtisë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
