Një nënë britanike, fëmija i së cilës vuan nga diabeti i tipit 1, ka përshëndetur modelin më të ri të linjës së kukullave Barbie si një mjet të rëndësishëm për rritjen e ndërgjegjësimit dhe përfshirjes. Ajo shprehet se ky model i ri do t’i ndihmojë fëmijët të kuptojnë më shumë për jetën me këtë sëmundje kronike.
Kukulla u prezantua javën e kaluar nga modelja 22-vjeçare Lila Moss, e cila vetë jeton me diabet, si pjesë e nismës së kompanisë Mattel për të promovuar përfaqësimin dhe diversitetin në industrinë e lodrave.
Barbie-ja e re vjen e pajisur me një monitor të glukozës dhe një pompë insuline, duke veshur një bluzë dhe fund me pika blu, ngjyra dhe simboli që përdoren globalisht për të rritur ndërgjegjësimin për diabetin. Hollie, nga qyteti Cleethorpes në Mbretërinë e Bashkuar, nëna e Will, një adoleshent 14-vjeçar me diabet tip 1, e vlerësoi lart këtë zhvillim, duke e cilësuar si një mënyrë për të “thyer stigmat”. “Will, për një kohë të gjatë nuk pranonte të mbante pompën ose sensorin, sepse ishin të dukshme dhe të gjithë do ta kuptonin menjëherë,” tregon ajo. Megjithatë, sipas saj, prezantimi i këtij modeli Barbie është një hap pozitiv, njësoj si prezantimi i mëparshëm i kukullave në karrige me rrota. “Është një nismë përfshirëse dhe mendoj se është një zhvillim shumë i mirë,” përfundon Hollie.
Will tha se tashmë ishte mësuar mjaft mirë me menaxhimin e diabetit dhe me faktin se duhej të “llogariste karbohidratet përpara se të hante diçka”. Duke folur për kukullën, ai tha se ishte “bukur të ndiheshe i përfshirë”, megjithëse kur u pyet nëse do të luante me një të tillë, u përgjigj: “Nuk besoj.” Motra më e vogël e Will-it, Alice, 8 vjeçe, tha se fëmijët që luanin me këtë kukull “mund të imagjinonin, të kuptonin më shumë rreth saj dhe të mësonin më shumë për diabetin”. “Është diçka shumë e rëndësishme,” shtoi ajo. Gjigandi amerikan i lodrave ishte kritikuar më parë për faktin se kukulla tradicionale Barbie nuk përfaqësonte realisht shumicën e grave. Në vitet e fundit, kompania ka krijuar kukulla me aparat dëgjimi, gjymtyrë protetike dhe karrige me rrota. Shtesa më e fundit është pritur pozitivisht nga grupet mbështetëse dhe profesionistët e shëndetit.
Lionel Curtis, nga Grupi Mbështetës për Diabetin në Hull dhe Rrethinë, i cili jeton me këtë gjendje prej më shumë se 30 vitesh, tha: “Mendoj se ideja e kësaj kukulle është absolutisht brilante për fëmijët.” Zoti Curtis theksoi se mbështetja dhe edukimi janë “thelbësore”, duke shtuar: “Mendoj se është një hap i madh përpara.” Debbie Hicks, e cila krijoi shërbimin e infermierisë së specializuar për diabetin në Hull, u diagnostikua me diabet të tipit 1 në vitin 1973, në moshën 12-vjeçare. Duke folur për ndikimin e saj, ajo tha: “Duke mos njohur askënd me diabet, ishte një tronditje e madhe për gjithë familjen. “Nuk ishte diçka me të cilën ishim përballur më parë – ishte një mënyrë e re jetese që duhej ta përvetësonim unë dhe familja ime.” “Vështirë të besohet, por në moshën 12-vjeçare përdorja një shiringë prej qelqi dhe gjilpërë që duhej mprehur një herë në javë.” Duke komentuar për kukullën, ajo tha se megjithëse teknologjia për menaxhimin e gjendjes është përmirësuar shumë gjatë viteve, çdo gjë që ndihmon në rritjen e ndërgjegjësimit është e mirëpritur.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto