Banka Botërore paralajmëroi të hënën se pandemia e koronavirusit dhe lufta e Rusisë në Ukrainë kishin kontribuar në një rënie të potencialit të rritjes afatgjatë të ekonomisë globale, duke çuar në atë që mund të ishte një “dekadë e humbur” që do të nënkuptonte më shumë varfëri dhe më pak burime për të luftuar ndikimin e ndryshimeve klimatike.
Paralajmërimi vjen ndërsa bota merret me kriza të mbivendosura – një pandemi që gjymtoi ekonomitë dhe tensionoi sistemet e shëndetit publik dhe pushtimin e Rusisë në Ukrainë, i cili ndërpreu zinxhirët e furnizimit global dhe dëmtoi lidhjet tregtare ndërkombëtare. Kërcënimi i një rënieje më të zgjatur përkon me shenja të reja stresi në sistemin financiar të botës, pasi një seri krizash bankare kërcënojnë të minojnë rritjen ekonomike.
Banka Botërore parashikoi në një raport të ri se prodhimi mesatar global potencial pritet të bjerë në nivelin më të ulët 30-vjeçar prej 2.2 përqind në vit midis 2023 dhe 2030. Kjo do të ishte një rënie e mprehtë nga 3.5 përqind në vit gjatë dekadës së parë të këtij shekulli.
Lexo edhe: Banka Botërore: Normat më të larta të interesit po sjellin rrezikun e recesionit
Rënia do të jetë edhe më e theksuar për ekonomitë në zhvillim, të cilat u rritën me një normë mesatare vjetore prej 6 për qind nga viti 2000 në 2010; kjo normë mund të bjerë në 4 për qind këtë dekadë.
“Një dekadë e humbur mund të jetë në krijim për ekonominë globale,” tha Indermit Gill, kryeekonomisti i Bankës Botërore dhe nënkryetar i lartë për ekonominë e zhvillimit. “Rënia e vazhdueshme e rritjes potenciale ka implikime serioze për aftësinë e botës për të trajtuar grupin në rritje të sfidave unike për kohën tonë – varfërinë kokëfortë, pabarazinë e të ardhurave dhe ndryshimet klimatike.”
Zyrtarët në Bankën Botërore thanë se “epokës së artë” të zhvillimit dukej se po i vinte fundi. Ata paralajmëruan se politikëbërësit do të duhet të bëhen më kreativë ndërsa përpiqen të adresojnë sfidat globale pa qenë në gjendje të mbështeten në zgjerimet e shpejta ekonomike të vendeve si Kina, e cila ka qenë prej kohësh një motor i rritjes në mbarë botën.
Ata sugjeruan që kornizat e politikës monetare dhe fiskale ndërkombëtare duhet të jenë më të përafruara dhe se liderët botërorë duhet të gjejnë mënyra për të ulur kostot tregtare dhe për të rritur pjesëmarrjen e tyre në fuqinë punëtore. Kthimi në rritje më të shpejtë, thanë ata, nuk do të jetë i lehtë.
“Do të duhet një përpjekje e fortë e politikës kolektive për të rikthyer rritjen në dekadën e ardhshme në mesataren e asaj të mëparshme”, tha Banka Botërore në raport./ New York Times
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
